Navoiyshunoslar forumi press-relizi
8-fevral kuni Toshkent viloyatining so‘lim maskani — Green Hills Resort manzili yana bir bor ma’naviyat va tafakkur markaziga aylandi.
Buyuk mutafakkir, so‘z mulkining sultoni Alisher Navoiy tavalludining 585 yilligi munosabati bilan xalqaro miqyosdagi “Navoiyshunoslar forumi” yuqori saviyada tashkil etildi.
Xalqaro Nordik universiteti va UzReport TV tashabbusi bilan Toshkent viloyati hokimligi, Alisher Navoiy nomidagi xalqaro jamoat fondi hamkorligida o‘tkazilgan mazkur nufuzli anjuman ilm ahli, adabiyotshunoslar, navoiyshunoslar, professor-o‘qituvchilar, talaba-yoshlar va madaniyat arboblarini bir maqsad – Navoiy merosini chuqur anglash va targ‘ib etish yo‘lida jamladi.
Anjuman doirasida o‘tkazilgan ilmiy-badiiy davra suhbatida nafaqat yurtimiz olimlari, Avstriya, Belgiya, Koreya,Turkiya, Eron, Pokiston, Qirg‘iziston va boshqa Yevropa, Sharq, Osiyo mamlakatlari navoiyshunoslari ma’ruzalari bilan ishtirok etdilar. Keng qamrovli ochiq fikr almashinuvi Navoiy merosini zamonaviy talqinda qayta o‘rganish imkonini berdi.
Forum nafaqat ilmiy uchrashuv, balki so‘z, tafakkur va ma’naviyat bayramiga aylandi. Unda Navoiy ijodining badiiy-estetik qudrati, turkiy til taraqqiyotidagi tarixiy o‘rni, ma’naviy-ma’rifiy merosining yoshlar tarbiyasidagi ahamiyati, xalqaro navoiyshunoslik istiqbollari, davlat va jamiyat boshqaruvidagi ma’murchilik islohotlaridagi o‘ziga xos jihatlari kabi masalalar atroflicha muhokama qilindi.
Mahalliy va xorijiy mutaxassislar Navoiyni mumtoz shoirgina emas, balki milliy tafakkur me’mori, ma’rifatparvar davlat arbobi va til siyosatining asoschisi sifatida e’tirof etib o‘tdilar.
Anjumanda qator ibratli takliflar ham ilgari surildi. Jamiyatda navoiyshunos olimlar imijini oshirish, jumladan akademik Aziz Qayumovning yuz yilligini munosib nishonlash, Navoiyga ixlosmandlikni xalq orasida keng yoyish takliflari ilgari surildi va Xalqaro Nordik universiteti, Alisher Navoiy nomidagi famoat fondi rahbariyati tomonidan maʼqullandi.
Shuningdek, kelgusi navoiyshunoslar avlodini tayyorlash, eng noyob fondlardan Navoiy qo‘lyozmalari, munojot, maktub va vaqfiyalarini to‘plash va ularning fiksimil nashri — aslini o‘qish imkoniyatini kengaytirish, raqamlashtirish ishlarini jadallashtirish, xorijiy olimlar uchun ilmiy transkripsiyasini yaratish hamda yig‘ma ilmiy nashrlar chop etish ishlarida birlashishga kelishildi.
Forumning rasmiy ochilishida Toshkent viloyati hokimining o‘rinbosari Otabek Sultanbekov, O‘zbekiston Yozuvchilar uyushmasi raisining ijodiy masalalar bo‘yicha birinchi o‘rinbosari Minhojiddin Mirzo, Maktabgacha va maktab ta’limi vazirining o‘rinbosari Farhod Boqiyey, Alisher Navoiy nomidagi o‘zbek tili va adabiyoti universiteti adabiyotshunos olimi Nurboy Jabborov, Xalqaro Nordik universiteti rektori, professor Sherzod Mustafakulov, Alisher Navoiy nomidagi xalqaro jamoat fondi direktori Olimjon Davlatov, shuningdek, turkiyalik olim Kemal Yavuz Ataman va boshqa xorijiy mehmon-tadqiqotchilarning ma’ruzalari tinglandi.
Ular Navoiy merosining jahon adabiyoti xazinasidagi o‘rni, turkiy so‘zning qudratini dunyoga tanitishdagi xizmatlari hamda komil inson tarbiyasidagi beqiyos ahamiyatini alohida ta’kidladilar. Bahor butun dunyoda mart oyida boshlansa Hazrat Navoiy bobomiz tavalludi munosabati bilan O‘zbekistonda 9-fevralda boshlanishi, bu oy chin maʼnoda maʼnaviy poklanish oyi ekanligi eʼtirof etib o‘tildi.
Ilm va san’at uyg‘unligi forumning eng yorqin jihati bo‘ldi. Forumda ma’ruzalar bilan birga Navoiyning sara g‘azallari o‘qildi va sharhlandi. Dostonlari badiiy tahlil etildi.
Badiiy kechada taniqli xonanda va el suygan san’atkorlar tomonidan Navoiy g‘azallariga bastalangan kuy-qo‘shiqlar ijro etilib, mehmonlarga unutilmas zavq ulashdi. Navoiy so‘zlari ohang, sahna va qalblarda yashayotgani yana bir bor namoyon bo‘ldi.
Mutaxassislarning ta’kidlashicha, Navoiy merosi bugun nafaqat milliy, balki umuminsoniy qadriyat sifatida dunyo ilmiy jamoatchiligi e’tiborini tobora ko‘proq jalb etmoqda. “Navoiyshunoslar forumi”da Hazrat Navoiy bugunimiz va kelajagimiz bunyodkori ham ekanligi, uning hikmatlari va saboqlari hamon millatlarni birlashtirib, qalblarni tarbiyalashi, yoshlarni yuksak maqsadlarga chorlab turishi o‘z isbotini topdi.
Forum yakunida qo‘shma ilmiy tadqiqotlar, nashrlar, tarjimalar va akademik almashinuvlarni kengaytirish bo‘yicha kelishuvlar ilgari surildi. Bu forum Navoiy poydevor qo‘ygan so‘z saltanatining bugungi avlod qalbidagi yangilangan sadosi bo‘ldi.
Finlandiya Prezidenti Aleksandr Stubbning O‘zbekistonga rasmiy tashrifi doirasida Xalqaro Nordik universitetiga tashrifi press-relizi
Finlandiya Respublikasi Prezidenti Aleksandr Stubbning O‘zbekiston Respublikasiga amalga oshirayotgan rasmiy tashrifi mamlakatlarimiz o‘rtasidagi do‘stlik va strategik sheriklik munosabatlarini yangi bosqichga olib chiqishga yo‘l ochmoqda.
O‘zbekiston Respublikasi Prezidenti Shavkat Mirziyoyevning taklifiga binoan Finlandiya Respublikasi Prezidenti Aleksandr Stubb 29-oktyabr – 1-noyabr kunlari mamlakatimizda rasmiy tashrif bilan bo‘lmoqda. Mazkur tashrif O‘zbekiston–Finlandiya munosabatlari tarixida muhim tarixiy voqea sifatida qayd etilib, ikki tomonlama hamkorlikni yangi mazmun va amaliy natijalar bilan boyitishga qaratilgan.
Tashrif doirasida 30-oktyabr kuni Finlandiya Prezidenti Aleksandr Stubb Toshkent shahridagi Xalqaro Nordik Universitetiga tashrif buyurdi. Yuqori martabali mehmonni O‘zbekiston Respublikasi Tashqi ishlar vazirligi mas’ullari, universitet rahbariyati, Finlandiyaning O‘zbekistondagi faxriy konsuli, universitet Boshqaruv kengashi raisi Alisher Jo‘rayev va akademik jamoa katta ehtirom bilan kutib oldilar.
Finlandiya hukumati tomonidan universitetga taqdim etilgan Karl Gustav Mannergeym tarixiy foto-ko‘rgazmasi bilan tanishuv amalga oshirildi va oliy darajadagi uchrashuv o‘tkazildi.
Shuningdek, “Nordic EdTech & Innovatsion HUB” modeli taqdimoti o‘tkazildi. Uchrashuv chog‘ida O‘zbekistonda Finlyandiya va Nordik davlatlari ta’lim modeli asosida ta’lim–ilm-fan–ishlab chiqarish integratsiyasini kuchaytirish, Finlyandiya oliy ta’lim muassasalari bilan qo‘shma ta’lim dasturlari, ikki diplomli ta’lim loyihalari va akademik almashinuvni kengaytirish, talabalar uchun Work & Travel Finland dasturini rivojlantirish va kvotalarni bosqichma-bosqich oshirish bo‘yicha sa’y-harakatlar natijalari Finlandiya davlat rahbarini mamnun qildi.
Uchrashuvda har ikki oyda fin bog‘cha va maktablari hamda oliy ta’lim muassasalarida O‘zbekiston pedagoglari uchun stajirovkalarni tizimli tashkil etish va ularning samaradorligini yanada oshirish, Nordik davlatlari hamkorligida biznes forumlari, innovatsiya sammitlari va xalqaro akademik konferensiyalar mazkur yo‘nalishlarda rivojlanish omili bo‘layotgani ta’kidlandi.
Samimiy ruhda o‘tgan uchrashuvda Xalqaro Nordik universiteti tomoni o‘zaro hamkorlikning amaliy yo‘nalishlarini yanada kengaytirish, bu borada yanada istiqbolli tashabbuslarni amalga oshirishni ko‘zda tutayotganini ma’lum qildi.
Elchi Oybek Shaxavdinov ishtirokidagi uchrashuv press-relizi
Nordik talabalari diplomatik tajribalar bilan tanishdilar.
Xalqaro Nordik universitetida O‘zbekiston Respublikasining Vengriya, Xorvatiya va Serbiya davlatlaridagi favqulodda va muxtor elchisi Oybek Shaxavdinov ishtirokida uchrashuv bo‘lib o‘tdi.
Uchrashuvda Xalqaro Nordik universiteti rahbariyati hamda elchi janoblari o‘rtasida samimiy muloqot o‘tkazildi. Unda Yevropa davlatlari, xususan, Vengriya, Xorvatiya va Serbiya bilan ilm-fan, ta’lim yo‘nalishlaridagi hamkorlik istiqbollari muhokama qilindi.
Shundan so‘ng Nordik talabalari uchun ularning dunyoqarashi va global savodxonligi hamda faolligini oshirishga xizmat qiladigan ilmiy-tahliliy uchrashuv bo‘lib o‘tdi. Respublikamiz elchisining “O‘zbekiston va Yevropa Ittifoqi munosabatlari hamda bu jarayonda Vengriya, Sloveniya va Xorvatiyaning o‘rni” mavzusida qiziqarli va amaliy mazmundagi ma’ruzasi tinglandi.
O‘zbekiston – Yevropa ittifoqi hamkorligining bugungi bosqichi, Markaziy Yevropa davlatlarining O‘zbekiston uchun strategik ahamiyati, ta’lim, diplomatiya va investitsiyaviy imkoniyatlar xususida keng ma’lumotlar berildi. Talabalar uchun Yevropada o‘qish va amaliyot dasturlari kabi tahlil va faktlarga boy jihatlarga ahamiyat qaratildi.
Ishtirokchi-yoshlar elchi bilan ochiq muloqotda bo‘lib, savol-javob va amaliy maslahatlar olish imkoniga ega bo‘ldilar. Uchrashuv orqali yoshlarda global fikr yuritish, diplomatik tafakkur va madaniyatni shakllantirishga e’tibor berildi.
Diplomatik faoliyat va ilmiy salohiyat e’tirofga loyiq uyg‘unlikdir. Uchrashuv davomida rahbariyat tomonidan elchi Oybek Shaxavdinovning Xalqaro Nordik universitetida xalqaro ta’lim hamkorliklarini yo‘lga qo‘yishdagi faol ishtiroki, ta’lim tadqiqotlarini takomillashtirish, xalqaro universitet sifatida shakllanish va rivojlanish jarayoniga qo‘shgan muhim hissalari alohida e’tirof etildi.
O‘zbekistonning xalqaro diplomatiya makonidagi nufuzli elchilardan biri bo‘lgan Oybek Shaxavdinovga Xalqaro Nordik universiteti “Faxriy professor”i ilmiy unvoni topshirildi. Tashkiliy, diplomatik hamkorlikni mustahkamlash, Yevropa oliy ta’lim makoniga integratsiya bo‘yicha amalga oshirgan tashabbuslari yuqori qadrlanib, ushbu faxriy unvon berilayotgani ta’kidlandi. Ushbu unvonning taqdim etilishi universitetning xalqaro ekspertlar va diplomatlar bilan hamkorlik asosida ilm almashish, ilmiy izlanishlar doirasini kengaytirish siyosatining yana bir amaliy namunasi bo‘ldi.
Elchi janoblari Nordik "Dil izhorlari" kitobiga ezgu tilaklarini yozib qoldirdi.
Xalqaro Nordik universiteti huzurida Rovan universiteti markazi rasmiy ochilishi press-relizi
2025-yil 25-oktyabr kuni Xalqaro Nordik universiteti huzurida Rovan universiteti markazining rasmiy ochilishi bo‘lib o‘tdi.
Markaz O‘zbekiston Respublikasi Prezidentining oliy ta’lim tizimini xalqaro standartlar asosida rivojlantirish, xorijiy nufuzli universitetlar bilan hamkorlikni kengaytirish hamda kadrlar tayyorlash sifatini oshirishga oid topshiriqlariga muvofiq tashkil etildi.
AQSHning nufuzli Rovan universiteti (Rowan University – https://www.rowan.edu/) bilan hamkorlikda tashkil etilgan markaz ochilishida O‘zbekiston Respublikasi Oliy ta’lim, fan va innovatsiyalar vazirligi, Maktabgacha va maktab ta’limi vazirligi, Ta’limni rivojlantirish respublika ilmiy-metodik markazi vakillari, AQSH elchixonasi mutasaddilari, Rovan va Nordik universiteti rahbariyati, akademiklar, deputatlar, OAV va keng jamoatchilik vakillari ishtirok etdilar.
Rowan University – AQSHning Nyu-Jersi shtatida joylashgan, muqim innovasion yo‘nalishdagi davlat universiteti bo‘lib, so‘nggi yillarda “Eng tez rivojlanayotgan universitet” sifatida AQSH reytinglarida e’tirof etib kelinmoqda.
Ochilish marosimida Rovan universiteti prezidenti, xalqaro miqyosdagi olim va islohotchi rahbar doktor Ali Houshmand, Oliy ta’lim, fan va innovatsiyalar vaziri Qo‘ng‘irotboy Sharipov, Maktabgacha va maktab ta’limi vaziri E’zozxon Karimova hamda Nordik rahbariyati tomonidan ramziy lenta kesildi.
Xalqaro Nordik universiteti rektori, professor Sherzod Mustafakulov anjumanni kirish so‘zi bilan ochib, mazkur markaz nafaqat Nordik universiteti balki yurtimizning xalqaro ta’lim maydonidagi navbatdagi yutug‘i ekanligini e’tirof etdi. Yangi markaz yangi imkoniyatlar, yangi g‘oyalar va yoshlar uchun global ta’lim eshiklarini ochishini ta’kidlab o‘tdi.
Oliy ta’lim, fan va innovatsiyalar vaziri Qo‘ng‘irotboy Sharipov bu kun oliy ta’lim tizimida tarixiy, faxrli kunlardan biri ekanligi, bu tashabbus, albatta xalqaro standartlarga yanada yaqinlashish, talabalarga global bilimlar maydoniga chiqish imkonini berishini e’tirof etdi.
— “Xalqaro Nordik universiteti va Rovan universiteti rahbariyati va jamoasiga, loyihani amalga oshirishda faol qatnashgan barcha mutaxassislarga chuqur minnatdorlik bildiramiz. Ishonchim komilki, Rovan universiteti markazi mamlakatimizda innovasion fikrlovchi, xalqaro maydonda raqobatbardosh mutaxassislarni tayyorlashda muhim o‘rin tutadi. U nafaqat talabalarga, balki butun ta’lim tizimimizga yangi turtki beradi” – dedi Qo‘ng‘irotboy Sharipov.
Ochilish tadbirida O‘zbekiston Respublikasi Maktabgacha va maktab ta’limi vaziri E’zozxon Karimova tomonidan ushbu hamkorlik ikki davlat o‘rtasidagi ta’lim aloqalarini yangi bosqichga olib chiqishi ta’kidladi.
“Rovan universiteti va Xalqaro Nordik universiteti o‘rtasidagi hamkorlik bilim, innovatsiya va xalqaro tajriba almashinuvining ramzidir. Biz birgalikda talabalarga global miqyosda raqobatbardosh ta’lim berishni maqsad qilganmiz,” – dedi ochilishda so‘z olgan Ali Hushmand.
Rovan universiteti Prezidenti, doktor Ali Hushmand janoblariga XNU “Faxriy doktori” ilmiy unvoni topshirildi.
Xalqaro Nordik universiteti Boshqaruv kengashi raisi, Finlandiyaning O‘zbekistondagi faxriy konsuli Alisher Jo‘rayev tomonidan ushbu Rovan universiteti markazi faoliyati o‘zbek va xorijiy talabalar uchun Amerika ta’lim standartlariga mos o‘quv dasturlari, qo‘shma ilmiy loyihalar, talaba va professorlar almashinuvi dasturlarini yo‘lga qo‘yishni nazarda tutishini ma’lum qildi.
Ochilish tadbirida so‘zga chiqqan nufuzli mehmonlar tomonidan Rovan universiteti markazining ochilishi mamlakatimizda xalqaro oliy ta’lim aloqalarini yangi bosqichga olib chiqish, ta’lim va innovatsiyalarni uyg‘unlashtirish, shuningdek, pedagogik, muhandislik, IT va tibbiyot sohalarida kadrlar tayyorlash tizimini global standartlarga moslashtirish yo‘lidagi muhim qadam hisoblanishini ta’kidlab o‘tdilar.
Rovan universiteti markazi faoliyati doirasida AQSH va O‘zbekiston o‘qituvchilari ishtirokida qo‘shma o‘quv va tadqiqot dasturlari yo‘lga qo‘yilishi, qo‘shma bakalavriat, magistratura va malaka oshirish dasturlari samarali amalga oshirilishi, talabalar va professor-o‘qituvchilar almashinuvi, ilmiy-amaliy seminarlar va treninglar o‘tkazilishi, talabalarga masofaviy ta’lim va xalqaro sertifikat dasturlari orqali o‘z malakasini oshirish imkoniyati yaratilishi ham e’tirof etib o‘tildi.
Ishtirokchilar yangi markaz binosi bilan tanishdilar va ikki oliygoh o‘rtasidagi strategik hamkorlik istiqbollari muhokama qilindi. Musiqa ohanglari ostida bir piyola choy ustida samimiy suhbatlar qurildi.
Markazning ochilish marosimi ikki davlat o‘rtasidagi ta’limiy hamkorlikni mustahkamlash bilan bir qatorda, mamlakatimizda xorijiy ta’lim muassasalari bilan strategik sheriklik modelini kengaytirishga xizmat qiladi. Shuningdek, ushbu markaz Nordik universiteti negizida xalqaro ilmiy-tadqiqot markazlari, qo‘shma laboratoriyalar va dual diplom dasturlarini joriy etish uchun poydevor yaratadi.
Erkin Vohidov nomidagi “E voh” respublika o‘zbek tili va adabiyoti olimpiadasining taqdirlash tadbiri va “O‘zbek tili bayrami”ga bag‘ishlangan festival press-relizi
2025-yil 19–20-oktyabr kunlari Erkin Vohidov nomidagi “E Voh” respublika o‘zbek tili va adabiyoti fan olimpiadasining final bosqichi o‘tkazildi. Ushbu nufuzli tadbir 21-oktyabr – “O‘zbek tili bayrami”ga bag‘ishlangan keng ko‘lamli festival va ilmiy-ma’rifiy uchrashuvlar bilan uyg‘un holda tashkil etildi.
O‘zbekiston Respublikasi Maktabgacha va maktab ta’limi vazirligi, Oliy ta’lim, fan va innovatsiyalar vazirligi, UzReport Axborot agentligi, Nordik universiteti, IDC ta’lim markazi va hamkor tashkilotlar ko‘magida o‘tkazilgan mazkur olimpiada o‘zbek tili va adabiyotini chuqur o‘rganish, bu sohadagi ilg‘or pedagogik yondashuvlarni targ‘ib qilish, shuningdek, o‘qituvchilarning kasbiy salohiyatini oshirishga qaratilgan respublika miqyosidagi loyiha sifatida katta ahamiyat kasb etdi.
Ma’lumot o‘rnida, 12-oktyabr kuni o‘tkazilgan birinchi onlayn bosqich respublikamiz bo‘ylab 10507 nafar talabgor-o‘qituvchilarni o‘zida jamladi. 1055 nafar ishtirokchi-ustozlar belgilangan muddatda topshiriqlarni muvaffaqiyatli yakunladi.
19-oktyabr kuni Xalqaro Nordik universiteti bazasida hal qiluvchi final bosqich o‘tkazilib, 14 ta hududdan eng yuqori natija qayd etgan besh nafardan (ballari teng barcha) jami 79 nafar malakali o‘qituvchi insho yozish va test sinovlari ko‘rinishida mahorat sinovidan o‘tkazildi.
Shuningdek, “E Voh-2025” doirasida pedagoglar uchun til va adabiyotning dolzarb masalalariga bag‘ishlangan davra suhbatlari, ustozlar uchun metodik taqdimotlar hamda badiiy dasturlar tashkil etiladi. Xususan, Nordik universitetida Finlyandiya ta’lim tizimiga asoslangan ilg‘or yondashuvlar bo‘yicha taqdimot o‘tkazildi. “Adiblar xiyoboni”ga tashrif buyurilib, mashhur adiblar haykallari oldida ijodiy suhbatlar, shahar bo‘ylab madaniy sayohatlar ham tashkil etildi.
20-oktyabr kuni Toshkent viloyati, Bo‘stonliq tumanida joylashgan Green Hills Resort maskanida olimpiadaning tantanali taqdirlash marosimi va “O‘zbek tili bayrami”ga bag‘ishlangan festival bo‘lib o‘tadi. Unda vazirlik va idoralar vakillari, xorijiy elchixonalar, xalqaro tashkilotlar, diplomatik korpus, Erkin Vohidov ijod maktabi ustoz va o‘quvchilari, taniqli shoir va adiblar, OAV hamda keng jamoatchilik ishtirok etadi.
Anjuman davlat Madhiyasi sadolari ostida ochildi.
“E voh-2025” o‘zbek tili va adabiyoti olimpiadasi g‘oliblari O‘zbekiston Respublikasi Prezidenti Administratsiyasi rahbarining ta’limni isloh qilish bo‘yicha o‘rinbosari Xilola Umarova, UzReport Axborot agentligi Bosh direktori Ravshanxon Djurayev, Xalqaro Nordik universiteti rektori Sherzod Mustafakulov, O‘zbekiston Respublikasi Oliy Majlisining Bola huquqlari bo‘yicha vakili (Bolalar Ombudsmani) Surayyo Rahmonova, O‘zbekiston Respublikasi Maktabgacha va maktab ta’lim vaziri E’zozxon Karimova E’zozxon va O‘zbekiston Respublikasi Oliy ta’lim, fan va innovatsiyalar vaziri Qo‘ng‘irotboy Sharipov tomonidan samimiy tabriklandilar hamda taqdirlandilar.
Shuningdek, O‘zbekiston Yozuvchilar uyushmasi raisi Sirojiddin Saidov, Alisher Navoiy nomidagi xalqaro jamoat fondi ijrochi direktori Olimjon Davlatov, Erkin Vohidov nomidagi ijod maktabi direktori Nigora Mannopova barcha g‘oliblarni samimiy qutladilar.
Gʻoliblar va faol ishtirokchilar Sertifikatlar, diplomlar, pul mukofotlari va esdalik sovg‘alari bilan taqdirlandilar.
Bayramona kechada mashhur adiblarning nutqlari, taniqli san’atkorlarning kuy-qo‘shiqlari, rang-barang madaniy chiqishlar hamda salyut namoyish etildi. Bayramda ona tilimizning boy badiiy-estetik qirralari va madaniy qudrati yana bir bor namoyon etildi.
Tadbirda xalqaro tashkilotlar vakillari, xorijiy elchilar, tilshunoslik va adabiyot yo‘nalishida izlanish olib borayotgan olimlar ham ishtirok etdilar. Xorijlik tadqiqotchilar bilan davra suhbatlari tashkil etilib, o‘zbek tili filologiyasini rivojlantirish istiqbollari yuzasidan ilmiy muloqot o‘tkazildi.
“E Voh” olimpiadasi nafaqat til va adabiyot fani bo‘yicha bilimlar bellashuvi, balki ona tilimizning nufuzini oshiruvchi, ilmiy va madaniy hamkorlikni kuchaytiruvchi muhim maydonga aylandi.
"Raqamli transformatsiya davrida pedagogik ta’limni rivojlantirish istiqbollari" konferensiyasi press-relizi
2025-yilning 15–16-oktabr kunlari Xalqaro Nordik universitetida Oliy ta’lim, fan va innovatsiyalar vazirligi bilan hamkorlikda “Raqamli transformatsiya davrida pedagogik ta’limni rivojlantirish istiqbollari” mavzusida xalqaro ilmiy-amaliy konferensiya o‘tkazildi.
Anjuman ta’lim sohasida innovatsion yondashuvlarni joriy etish, pedagogik jarayonlarni raqamlashtirish va global tajribani milliy amaliyot bilan uyg‘unlashtirish masalalariga bag‘ishlandi.
Mazkur anjuman O‘zbekiston Respublikasi Prezidentining “Pedagogik ta’lim sifatini oshirish va pedagog kadrlar tayyorlovchi oliy ta’lim muassasalari faoliyatini yanada rivojlantirish chora-tadbirlari to‘g‘risida”gi qarori hamda PQ–289-sonli hujjatda belgilangan ustuvor vazifalar ijrosi doirasida o‘tkazildi.
Konferensiyaning maqsadi – raqamli transformatsiya jarayonida pedagogik ta’lim tizimini modernizatsiya qilish, sun’iy intellekt, innovatsion texnologiyalar, inklyuziv yondashuvlar va barqaror rivojlanish tamoyillarini amaliyotga tatbiq etish yo‘llarini ilmiy asosda tahlil qilishga qaratildi.
Tadbirda O‘zbekiston, Finlyandiya, Janubiy Koreya, Turkiya, Qozog‘iston, Rossiya va boshqa davlatlarning yetakchi oliy ta’lim muassasalari olimlari, ilmiy tadqiqotchilar, amaliyotchi pedagoglar hamda doktorantlar ishtirok etishdi.
Konferensiya ochilishida so‘zga chiqqanlar zamonaviy pedagogik tizimda inson omili bilan raqamli texnologiyalar uyg‘unligi o‘qitish sifatini oshirishning eng muhim omillaridan biri ekanligi, xususan, maktabgacha ta’limdan boshlab oliy ta’limgacha bo‘lgan bosqichlarda raqamli platformalar, adaptiv ta’lim tizimlari va sun’iy intellekt asosidagi baholash vositalarini joriy etish orqali ta’lim jarayonining shaffofligi va natijadorligini ta’minlash mumkinligini alohida e’tirof etdilar. Konferensiya ishida barcha tadqiqotchilarga muvaffaqiyat tiladilar.
Konferensiya doirasida beshta ilmiy sho‘ba faoliyat yuritdi:
➖ Sifatli ta’lim – barqaror taraqqiyot kafolati: xorijiy tajriba va mahalliy amaliyot;
➖ Sun’iy intellekt va insoniy munosabatlar transformatsiyasi: shaxsdagi muvaffaqiyatlar va rivojlanish istiqbollari;
➖ Inklyuziv ta’limdan inklyuziv jamiyat sari: strategiyalar, tajribalar va zamonaviy ta’lim texnologiyalari;
➖ Maktabgacha ta’limda raqamli texnologiyalardan foydalanish: strategik yondashuvlar va innovatsiyalar;
➖ Til va adabiyot ta’limida dolzarb muammolar va yechimlar.
Ishtirokchilar raqamli transformatsiya sharoitida o‘qituvchi shaxsining roli, pedagogik kompetensiyalarni rivojlantirishning zamonaviy modellari, shuningdek, ta’lim jarayonida sun’iy intellekt va raqamli vositalardan samarali foydalanish masalalarini keng muhokama qildilar.
Konferensiya doirasida taqdim etilgan ilmiy maqolalar Google Scholar va xalqaro ilmiy bazalarda indeksatsiyalanadi hamda DOI belgilanadi. Bu esa tadqiqotchilar ilmiy natijalarining global ilmiy hamjamiyatda tan olinishi uchun muhim ahamiyatga ega.
Bundan tashqari, Xalqaro Nordik universiteti bilan Finlyandiya, Shvetsiya, Janubiy Koreya va Turkiya oliy ta’lim muassasalari o‘rtasida yangi hamkorlik memorandumlari imzolanishi rejalashtirilmoqda. Mazkur kelishuvlar pedagogik ta’lim sifatini yuksaltirish, professor-o‘qituvchilar malakasini oshirish va talabalar almashinuvi dasturlarini kengaytirishga xizmat qiladi.Konferensiya yakunida ishtirokchilar tomonidan qator tavsiyalar ilgari surildi. Jumladan, pedagogik ta’limda raqamli savodxonlikni oshirish bo‘yicha o‘qituvchilarni qayta tayyorlash tizimini kuchaytirish, ta’lim jarayonida sun’iy intellektdan foydalanishning me’yorlarini ishlab chiqish, o‘quv dasturlarini zamonaviy mehnat bozori talablari bilan uyg‘unlashtirish, inklyuziv ta’limni raqamli infratuzilma orqali qo‘llab-quvvatlash, ta’limda xalqaro tajribalarni tizimli o‘rganish va milliy amaliyotga moslashtirish shular jumlasidan.
Xalqaro Nordik universiteti o‘z faoliyatida ta’limda raqamli yechimlarni joriy etish, ijodkorlik va innovatsion fikrlashni rag‘batlantirish, hamda pedagogik kadrlar tayyorlashda xalqaro standartlarga asoslanishga alohida e’tibor qaratmoqda. Mazkur konferensiya bu boradagi strategik tashabbuslarning mantiqiy davomi bo‘ldi.
Tadbir yakunida ilmiy-amaliy ishlanmalar asosida tuzilgan maqolalar to‘plami elektron shaklda e’lon qilinib, barcha ishtirokchilarga sertifikatlar topshirildi.
Xalqaro Nordik universiteti “Orientation week” o‘quv-tanishtiruv haftaligi press-relizi
Nordik universitetida yangi o‘quv yili boshlanishi munosabati bilan 15–18-sentyabr kunlari 1-kurs talabalariga mo‘ljallangan sermazmun va qiziqarli dastur - “Orientation week” o‘quv-tanishtiruv haftaligi o‘tkazildi.
Ushbu haftalikda Nordik oilasiga qadam qo‘ygan har bir yangi talaba katta e’tibor bilan qarshi olinib, oliygohning qadriyatlari, ta’lim tizimi, mustaqil ta’limning o‘rni va talabalik hayotining sir-asrorlari bilan tanishtirildi.
Dastlabki kun – 15-sentyabrda Harbiy shon-shuhrat - “Jasorat” istirohat bog‘ida tantanali ochilish tadbiri o‘tkazilib, talabalar jonli musiqa sadolari ostida kutib olindilar.
Vatanimiz Davlat Madhiyasi yangradi. Harbiy orkestrning yurt madhiga uyg‘un ijrolari, faxriy qorovulning tantanali saf tortishi va universitet rektori Sherzod Mustafakulov hamda faxriy mehmonlarning samimiy tabrik so‘zlari yoshlarning qalbida unutilmas taassurot uyg‘otdi. Yangi talabalar, universitet granti sohibi bo‘lgan yoshlar o‘z dil izhorlarini yo‘lladilar.
Bayramona boshlangan dastur samimiy muloqotlar va universitet binosiga sayohat bilan davom etdi. Yangi talabalar auditoriyalarda o‘z guruhlarida jamlanib, ularga universitetning odob-axloq qoidalari, korporativ etika kodeksi hamda ta’lim jarayonidagi kredit-modul tizimi haqida batafsil ma’lumotlar berildi.
Haftalik dastur davomida “University tour” – oliygoh bo‘ylab sayohat, ko‘rgazmalar, talabalar klublari yarmarkasi, maxsus fotozonalar tashkil qilindi. Barcha jarayonlarda talabalarning oliygohga amaliy moslashuviga e’tibor qaratildi.
Pizza party – talabalar o‘rtasida samimiylikni mustahkamlovchi o‘ziga xos davra bo‘ldi. Ijtimoiy-psixologik treninglar, tyutorlik mashg‘ulotlari, HEMIS tizimidan foydalanish bo‘yicha amaliy mashqlarda talaba-yoshlar katta qiziqish bilan ishtirok etdilar. Bu mashg‘ulotlar orqali guruhlarda do‘stona muhit yaratildi.
Shuningdek, “Work and travel” dasturi, intellektual o‘yinlar, kitob mutolaasi bo‘yicha interfaol suhbatlar o‘tkazildi.
18 sentyabr kuni “Orientation Week” dasturi doirasida talabalar uchun unutilmas bayram tashkil etildi. Adiblar xiyobonidagi Alisher Navoiy haykali qarshisida talabalar madaniy va ko‘ngilochar tadbirlarda ishtirok etishdi. “Kalmar o‘yini” esa ularni qizg‘in musobaqa va hayajonli lahzalar, bahslarga chorlab, maydonni yanada jonlantirdi.
O‘quv yilining boshlanishi talabalar uchun musiqa, raqs, o‘yin va tanlovlarga boy “Freshmen Party” bilan esda qolarli tarzda boshlandi. Tadbir DJ Bellaning quvnoq musiqiy setlari ostida yanada shukuhli ruhda o‘tdi.
Nordikda har bir yangi talaba e’tibor markazida bo‘ldi. Universitet o‘z talabalari uchun mustahkam bilim manbai, ijodiy muhit va keng imkoniyatlar maydonini taqdim etishga intiladi. “Orientation Week” esa – bu yo‘ldagi ilk qadamlardan biri, yoshlarga ta’lim, do‘stlik va kelajak sari ishonchli hamrohlikni va’da etuvchi ezgu an’ana sifatida talabalarda jamoaviylik hissini kuchaytiradi.
Xalqaro Nordik Universitetida mingdan ortiq talaba-yoshlar global ilm-fan va muvaffaqiyat yo‘llarini mazmunli boshladilar.
"Bitiruvchi-2025" tantanasi": press-reliz
Yoshlar ijod saroyi. 2025-yil 5-avgust. Xalqaro Nordik universitetining bakalavr va magistr bitiruvchilari hayotidagi eng muhim kunlardan biri – bitiruv kechasi va diplom topshirish marosimi o‘tkazildi.
Tadbir muhtasham va tantanali ruhda boshlandi. Bayramona kechada universitetni tamomlagan bitiruvchilar – kecha qahramonlari o‘z o‘rnilarini egalladilar. Kechada ustozlar, bitiruvchilarning ota-onalari va yaqinlari ham quvonch, g‘urur va minnatdorchilik tuyg‘ulari bilan ishtirok etdilar.
Universitet hayoti aks etgan videorolikda talabalarning yorqin onlari jonlandi va barchaga bayramona kayfiyat, ajib taassurotlar bag‘ishladi.
Tantanali marosimda Davlat madhiyasi sadolari yangradi.
Shundan so‘ng tadbir boshlovchilari tabrik uchun Xalqaro Nordik universiteti rektori Sherzod Mustafakulov va O'zbekiston Yozuvchilar uyushmasi raisi, O'zbekiston Xalq shoiri, zamonaviy o'zbek she'riyatining atoqli vakili Sirojiddin Sayyidni sahnaga taklif qildilar. Bilim, fidoyilik va mehnatsevarlik bitiruvchilarning eng katta boyligi ekanligi e’tirof etildi. Yurtimiz ravnaqiga hissa qo‘shishga tayyor, zamonaviy tafakkur sohiblari – bitiruvchi-talabalarga samimiy tilaklar yo‘llanib, ularga kelgusidagi ilmiy, kasbiy faoliyatlarida muvaffaqiyatlar tilandi. Bugungi bitiruvchilar ertangi yetakchilar, jamiyat bunyodkorlari bo‘lishlariga chuqur ishonch bildirildi.
Tantanali daqiqalarda yuzlarida iftixor, ko‘zlarida quvonch aks etgan kecha qahramonlari – magistrlarga diplomlar topshirildi va gul tuhfa etildi.
Anjumanga tashrif buyurgan Alisher Fayz, Jenisbek Piyazov kabi sahna yulduzlari bitiruvchilarga jozibador kuy-qo‘shiqlari bilan o‘z tabriklarini yo‘lladilar.
Universitet dekanlari Elshod Umarov va Zulfiya Hamidovalar ham o‘z tabriklari va samimiy murojaatlarida bitiruvchilarning bilimga chanqoqligi, fidoyiligi va mehnatsevarligini alohida e’tirof etdilar.
Tabriknomalar va gullar bilan bakalavr-bitiruvchilarga ham quvonch ulashildi. Universitet prorektorlari barchani samimiy qutlab, eng ezgu tilaklarini bildirdilar.
Anjumanga tashrif buyurgan taniqli xonandalar, "Sado" guruhi ijodkorlari o‘zlarining betakror ijrolari bilan davraga fayz bag‘ishladilar.
Bayram kechasida so‘z olgan bitiruvchilar universitet jamoasiga o‘z minnatdorchiliklarini izhor etib, ustozlardan olgan bilim va ko‘nikmalari kelgusi hayotlarida mustahkam tayanch bo‘lishini e’tirof etdilar.
Kechaning eng hayajonli daqiqalarida universitet Madhiyasini hamma birgalikda kuyladi, har bir ishtirokchi Nordik jamoasining bir bo‘lagi ekanidan faxr hissini tuydi.
Ushbu unutilmas kecha Xalqaro Nordik universiteti jamoasi va bitiruvchilari uchun faxr va shukronalik bayramiga aylandi. Sahnada musiqa va raqslar bilan shodiyona davom etdi.
Bitiruv kechasi ma’lum yillik bilim va izlanishlarning ramziy yakuni hamda bitiruvchilarga o‘z sohalari bo‘yicha katta hayot sari dadil qadam bo‘ldi. "Bu kunni hech qachon unutmaymiz" dedilar bitiruvchi-talabalar – kelajak yetakchilari! Bitiruv oqshomi – magistr va bakalavrlar hamda Nordik uchun bu tarixiy quvonchli lahzalar yorqin suratlar hamda qalblarga muhrlandi. Diplom topshirish marosimi ilm, mehnat va orzular uyg‘unlashgan bayram sifatida tantanali nishonlandi.
Shvetsiya delegatsiyasi Nordik universitetida: ta’lim va sanoat integratsiyasi yo‘lida muhim uchrashuv press-relizi
Xalqaro Nordik universiteti navbatdagi nufuzli xalqaro mehmonlarni qarshi oldi. Shvetsiya Tashqi ishlar vazirligi Savdo siyosati departamenti bosh direktori Kamilla Mellander boshchiligidagi delegatsiya O‘zbekistonga tashrifi doirasida Nordik universitetida bo‘ldi. O‘zbekiston Respublikasi Investitsiyalar, sanoat va savdo vazirligi hamda Tog‘-kon sanoati va geologiya vazirligi mutasaddilari hamrohligidagi delegatsiya va Nordik universiteti rahbariyati o‘rtasida samimiy muloqot o‘tkazildi.
Delegatsiya tarkibida "EOL Vent Mining", "Sandvik", "Epiros", "Scania", "Skf", "Ericsson", "Atlas Copco" kabi Shvetsiyaning yirik, ilg‘or sanoat kompaniyalari rahbarlari va menejerlari ishtirok etdilar. Mazkur kompaniyalar konchilik, mashinasozlik, axborot texnologiyalari va energetika sohalarida innovatsion yechimlari bilan tanilgan.
Uchrashuvda ikki tomonlama aloqalarni mustahkamlash, innovatsion, taʼlim va sanoat hamkorligi asoslarini shakllantirishga ahamiyat qaratildi.
Tashrif doirasida mehmonlar universitet infratuzilmasi, ilmiy-tadqiqot faoliyati va xalqaro loyihalari bilan tanishtirildilar. Uchrashuvda ta’lim va sanoat integratsiyasi, talabalar amaliyoti, qo‘shma ilmiy loyihalar, hamkorlikda inkubatsiya markazlari yaratish, soha mutaxassislarini tayyorlash kabi dolzarb masalalarda fikr almashildi va kelishuvlar amalga oshirildi.
Nordik universitetining xalqaro aloqalarni rivojlantirish borasidagi strategiyasi Shvetsiya kabi ilg‘or davlatlar bilan hamkorlikda zamonaviy, raqobatbardosh va amaliy bilimlarga asoslangan ta’lim tizimini shakllantirishga xizmat qiladi.