Press relizlar

BBC vakilining tashrifi press-relizi

Xalqaro Nordik universiteti “Uzreport jurnalistika, media va kommunikatsiyalar akademiyasi”ga BBCning Yevrosiyo bo‘yicha tijorat vakillari boshlig‘i, "European News Academy" va "Dars consulting" direktori Sergey Stanovkin tashrif buyurdi.

BBC tahririyatining tajribali vakili bilan Jurnalistika yo‘nalishi va mutaxassisligi talabalarining uchrashuvi tashkillandi. Talabalar bilan muloqotda Sergey Stanovkin xalqaro OAV va kommunikatsiyalar sohasidagi tajribalari, tijoriy televizion dasturlarni boshqarish mahorati, global hamkorliklarning innovatsion imkoniyatlarini targ‘ib etish bo‘yicha ko‘nikmalarini yetkazdi. 

Maʼruzachi stereotiplar masalasiga to‘xtalib, ularni o‘rganish va shakllantirish juda muhimligini eʼtirof etdi. Stereotiplar bilan kurashish qiyinligi, ammo ko‘pincha ulardan foydalanish mumkinligini qayd etib o‘tdi. 

Uchrashuvda talabalarga qator OAVlarning brend yaxlitligi va nufuzi darajalari bo‘yicha ham tadqiqiy maʼlumotlar taqdim etildi. Ishonchlilik va obro‘ darajalari, ularning jamoatchilik orasida qabul qilinishi diagrammalar asosida sharhlab berildi. 

"Davlat kommunikatsiyalari, xususan mamlakat brendi va investitsiyalarni targ‘ib qilish sohasida xodimlarning shaxsiy malakasi muvaffaqiyat omili hisoblanadi. Bu shunchaki axborotni ishlab chiqish va tarqatish emas, balki strategik kommunikatsiyalar sanʼatini egallash va umumiy brend maqsadlariga muvofiq harakat qilishni anglatadi. 

Jurnalistning intervyu jarayonida shaxsiy muloqot ko‘nikmalari, qiyin savollardan qochish qobiliyati ham davlatning PR faoliyatiga bevosita taʼsir ko‘rsatadi. Intervyu jarayonida faqatgina axborotni chuqur tahlil qilish emas, balki materialni ijodiy taqdim etish ham muhim. 

Axborot muhitini to‘g‘ri baholash, OAV platformalarini to‘g‘ri tanlash va ulardan unumli foydalanish, tezkor tahlil qilish, tekshirish va eng samarali formatda yetkazish qobiliyati muhimdir. 

Soxta yangiliklar mamlakat imidjiga putur yetkazishi mumkin bo‘lgan zamonda jurnalistning axborotni tez va aniq tekshirish, tasdiqlash va yolg‘on maʼlumotlarga qarshi kurashish qobiliyati juda muhimdir", dedi Sergey Stanovkin. 

Muloqotda OAV platformalarini tahlil qilish, ularning miqdoriy va sifat jihatlarini hisobga olish muhimligi ham taʼkidlandi. Media strategiyasida muvaffaqiyat moddiy va nomoddiy omillarning uyg‘unligiga bog‘liqligi, OAV manbasining ishonchliligi ko‘pincha xabardagi yangilikdan ham ko‘proq ahamiyat kasb etishi aytib o‘tildi. 

Shuningdek, tomoshabinlarning turli brendlar, masalan BBC World News, Bloomberg, CNBC, CNNni tomosha qilishi va qanday qabul qilayotgani turli indikatorlar asosida tahlil qilindi. Jumladan, ishonchli, taʼsirli, rag‘batlantiruvchi, doim birinchi xabardor qiluvchi, majburiy ko‘riluvchi kabi indikatorlarda har bir brendning qadriyatlari aks etishi maʼlum qilindi. 

Muloqot davomida maʼruzachi turli mamlakatlarning kelajak brendlarini yaratishda ahamiyatli jihatlar bo‘yicha ham tajribalari bilan bo‘lishdi. Norvegiya, Germaniya kabi qator davlatlarning o‘ziga xosligi ochib berilgan videomateriallar namoyish etildi. 

Mamlakat brendining global ijtimoiy media muloqotlarida tilga olinishi, ilg‘or texnologiyalari, merosi va madaniyati, turmush darajasi, qaysi sohalarda eng tajribali ekanligi, tabiiy go‘zalligi, ekologik standartlarga muvofiqligi borasidagi aniq, tahliliy maʼlumotlardan foydalanish maqsadga muvofiqligini aytib o‘tildi.

Britaniyaning DARS FILMS studiyasi tomonidan Qozog‘iston Tashqi ishlar vazirligi buyurtmasi asosida tayyorlangan 90 soniyali mini-filmdan ayrim lavhalar namoyish etildi. Film asosida zamonaviy Qozog‘istonning rivojlanish tarixi, raqobatdosh afzalliklari va yutuqlarini taqdim etish uslublariga nazar solindi. O‘tmish va hozirgi kun uyg‘unligi orqali mamlakatning dinamik rivojlanishi ochib berilib, mamlakat kelajak brendi ulkan rivojlanish salohiyatiga ega sifatida ko‘rsatildi. 

Maʼruzada mamlakat imidji va brendini tanitishda jurnalistlar oldida turgan maqsad, vazifalar, yechimlar har jihatdan ochib berildi.

Master-klassda globalizatsiya va raqamli transformatsiya davrida audiovizual OAVning kelajagiga keng nazar tashlandi. Talabalar o‘zlarini qiziqtirgan ko‘plab savollarga javoblar oldilar. 

BBCning televideniye, radio xizmatlari va veb-sayt kontentlari yaratishdagi mukammal tajribalari talabalar, jurnalistlar tayyorlovchi o‘qituvchilar uchun o‘ziga xos tajriba maktabi vazifasini o‘tashi va bu borada BBC Xalqaro Nordik universiteti “Uzreport jurnalistika, media va kommunikatsiyalar akademiyasi” bilan hamkorlikka tayyorligi maʼlum qilindi. 

Universitet rahbariyati tomonidan Sergey Stanovkinga Xalqaro Nordik universiteti Faxriy professori unvoni topshirildi. 

Nufuzli mehmon Nordik dil izhorlari kitobiga iliq fikrlarini yozib qoldirdi.

“TasIMO-2025” ikkinchi bosqichi press-relizi

Joriy yilning 23 fevral kuni Toshkent xalqaro matematika olimpiadasi (TasIMO)ning ikkinchi bosqichi 14 ta ma’muriy hudud markazlarida offlayn tarzda yuqori darajadagi intellektual bellashuv sifatida o‘tkazildi.   

Xalqaro Nordik universiteti, IDC (Intelligence Development Center) ta’lim markazi tashabbusi bilan tashkil etilgan 3 bosqichli nufuzli musobaqa yurtimizda yosh matematiklar o‘rtasida xalqaro miqyosda sog‘lom raqobatni boshlab berdi. Bu ezgu tashabbus zamirida ilm-fan taraqqiyoti, ijtimoiy va ma’rifiy samaradorlik va yoshlarning muvaffaqiyatiga xizmat qilish kabi maqsadlar mujassam. Shuningdek, o‘quvchilarning tadqiqotlar, innovatsiyalarga qiziqishlarini oshirish, analitik hamda mantiqiy fikrlashlarida zarur ko‘nikmalarni rivojlantish, masalalarga tezkor va to‘g‘ri yechimlar taklif etish qobiliyatlarini oshirib borish ko‘zda tutildi.  

“TasIMO-2025”ning 2024 yil 14-15-dekabr kunlari o‘tkazilgan birinchi onlayn bosqichida respublikamiz hududlaridan ro‘yxatdan o‘tganlar soni 500 000 nafarni tashkil qildi. Keng qamrovda o‘tkazilgan olimpiadada 66 191 nafar o‘quvchi ishtirok etdi. 3-11-sinflar doirasida 2 983 nafar yosh matematiklar 50 balldan yuqori to‘plab, birinchi 50 talik orasidan joy oldilar. Saralab olingan talabgorlar ikkinchi bosqichda ishtirok etish uchun tavsiya qilindilar. Ikkinchi bosqichda qatnashayotganlar soni bo‘yicha hududlar kesimida birinchi o‘rin Namangan viloyatiga to‘g‘ri keldi. Eng ko‘p ishtirokchi-bilimdonlar 3-sinflar kesimida qayd etildi. Ikkinchi bosqichga tavsiya etilganlarning eng ko‘pini esa 4-sinf o‘quvchilari tashkil etdi.  

Olimpiadaning ikkinchi bosqichini oflayn o‘tkazishda ishtirokchi-talabgorlarga qulaylik yaratish maqsadida 14 ta ma’muriy hudud markazlaridagi davlat va nodavlat ta’lim muassasalari, maktab va o‘quv markazlar bilan hamkorlik o‘rnatildi. Ota-onalari, ustozlari hamrohligida kelgan o‘quvchilar olimpiada jamoasi tomonidan e’tibor bilan kutib olindi. Barcha ishtirokchilarga olimpiada dasturi, musobaqada ishtirok etganliklarini eslatuvchi maxsus atributlar tuhfa qilindi.

Imtihon avvalida ikkinchi bosqichga yetib kelgan yosh bilimdonlar samimiy qutlandilar va ularga omadlar tilandi. Bu bellashuv matematik bilim egalarining iqtidorini jamiyat rivoji yo‘lida safarbar etishda qo‘l kelishi va haqiqiy bilim egalari kashf etilishiga ishonch bildirildi. 

TasIMOning ikkinchi bosqichiga barcha hududlarda bir vaqtda - 10:00 da start berildi. Olimpiada jarayonini qiziqarli va ishtirokchilarni rag‘batlantiruvchi amallar bilan yuqori saviyada o‘tkazish uchun tashkilotchilar tomonidan barcha sa’y-harakatlar amalga oshirildi. 1-smenada 5, 6, 7 va 8-sinflar, 2-smenada 3, 4, 9, 10 va 11-sinflar o‘quvchilarining topshiriqlarni bajarish jarayonlari kameralar bilan jihozlangan xonalarda hakamlar kuzatuvi ostida teng sharoitda, shaffof tashkil etilib, reglamentga ko‘ra 2 soat davom etdi. Musobaqalar yosh matematiklardan katta bilim va mahorat talab etdi. Bilimdonlar belgilangan vaqt mobaynida misol va topshiriqlar yechimi ustida ishladilar. O‘quvchilarning yaqinlariga jarayonlarni kuzatishlari uchun imkoniyat yaratib berildi.

Olimpiadadan so‘ng ishtirokchi-o‘quvchilarga topshiriqlarning yechimlari bilan tanishish imkoniyati ham yaratildi.

Olimpiadaga tayyorgarlik katta hajmdagi bilim va amaliyotni talab qiladi. Shu bois telegram ijtimoiy tarmog‘ida olimpiadaning rasmiy sahifasi tashkil etilib, IDC ta’lim markazi, Qorako‘l ziyo o‘quv markazlarining tajribali ustozlari tomonidan onlayn darslar o‘tkazib borildi, sinflar kesimida test topshiriqlari joylab turildi. Bu esa ishtirokchilarda matematik fikrlash va umumiy masalalarni to‘g‘ri yechish ko‘nikmalarini rivojlantirishga yordam berdi. Ayni paytda mazkur ezgu ishlar davom ettirilmoqda.

Ushbu xalqaro bellashuv matematik bilim egalarining iqtidorini kelgusida jamiyat rivoji yo‘lida safarbar etishda qo‘l keladi. Olimpiada kelajak egalarining aniq fanlarga bo‘lgan qiziqishlarini erta aniqlash, yosh iqtidor egalarini kashf qilish, umumta’lim maktablarida tahsil olayotgan o‘quvchilarni har tomonlama komil inson qilib tarbiyalash, keng mushohadalilik, tahliliy va mantiqiy tafakkur yuritish qobiliyatlarini rivojlantirish maqsadlarida har yili an’naviy tarzda o‘tkazib boriladi.

II O‘zbekiston – Finlandiya biznes forumi press-relizi

Joriy yilning 21-yanvar kuni Xalqaro Nordik universiteti tomonidan II "O‘zbekiston-Finlandiya xalqaro biznes-forumi"ning “Zamonaviy va innovatsion qurilish texnologiyalari” mavzusidagi xalqaro anjumani tashkil etildi. 

Finlandiyaning “Peikko”, “Kone”, “AINS Group”, “Elematic” va “East office” yirik kompaniyalari hamkorligida o‘tkazilgan xalqaro forumda ikki davlat vazirlik va idoralari, dunyoning yetakchi fin kompaniyalari, 50 ta mahalliy kompaniyalar rahbarlari va mutaxassislari hamda OAVlar vakillari ishtirok etdilar. 

Xalqaro Nordik universitetida ushbu forumning ochilishi bo‘lib o‘tdi. Finlandiyaning O‘zbekistondagi faxriy Konsuli, Nordik universiteti Kuzatuv kengashi raisi Alisher Jo‘rayev forumning ahamiyatiga alohida to‘xtalib o‘tdi. Forum doirasida Finlandiya kompaniyalarining eng zamonaviy qurilish texnologiyalari, innovasion ishlanmalari, asbob-uskunlari hamda qurilish konsepsiyalari namoyish etilishini ma’lum qildi. 

Finlandiyaning Markaziy Osiyodagi favqulodda va muxtor elchisi Ilkka Raisanen forumda yetakchi fin kompaniyalari va mahalliy biznes vakillarining B2B, B2G uchrashuvlari tashkil etilishi o‘zaro hamkorlik shartnomalari imzolash va kelajakda istiqbolli loyihalar bo‘yicha hamkorlik qilishda muhim ahamiyat kasb etishini ta’kidlab o‘tdi.

Finlandiyaning eng katta aksiyadorlik jamoalarini o‘z ichiga olgan “East office” kompaniyasi ijrochi direktori Janne Harjunpaa forum ishida barcha delegatlarga muvaffaqiyat tiladi.

Biznes-forumda delegatlar tomonidan ikki mamlakatning o‘zaro hamkorligini yanada rivojlantirishga qaratilgan taqdimotlar namoyish etildi. “Peikko”, “Kone”, “AINS Group”, “Elematic” va “East office” kompaniyalarining innovasion yechimlari, tajribalari, tadqiqot va biznes loyihalari, maqsadlari va O‘zbekistonda tizimlarga olib kirilishi mumkin bo‘lgan yangi texnologiyalari bilan tanishildi. 

Forumda biznes va ishbilarmon doiralar tomonidan savdo-iqtisodiy, sarmoyaviy hamkorlikning bugungi holati va istiqboli muhokama qilindi.

O‘zbekiston - Finlyandiya kompaniyalarining iqtisodiy munosabatlarini kengaytirish, yuqori texnologiyalarga asoslangan qo‘shma ishlab chiqarish va savdo ob’yektlarini yaratish, ilmiy tadqiqotlarni amalga oshirish, iqtisodiy sohalar uchun yuqori malakali kadrlar tayyorlash va ularning amaliyotlarini tashkil etish kabi qator yo‘nalishlarda kooperatsiya aloqalarini o‘rnatish imkoniyatlari mavjudligi ma’lum qilindi. 

B2B, B2G formatdagi uchrashuvlarda har tomonlama manfaatli hamkorlik borasida muzokaralar olib borildi. Ishbilarmon doiralar bilan o‘zaro hamkorlik shartnomalari imzolandi va kelajakda istiqbolli loyihalar bo‘yicha hamkorlik qilishga kelishildi. 

 Ma’lumot uchun: 2022-yil Xalqaro Nordik universiteti va “Saipro Group” tomonidan O‘zbekiston Respublikasi Tashqi ishlar vazirligi ko‘magida O‘zbekistonda ilk bor birinchi "O‘zbekiston-Finlyandiya xalqaro biznes-forumi" o‘tkazilgan. Unda ikki davlat vazirlik va idoralari, dunyoning yetakchi fin kompaniyalari, xususan, Nokia, Reka Sables, FinnPartnership, Honka, Kone, Suokone kabi 30 dan ortiq kompaniya rahbarlari va mutaxassislari ishtirok etgan.

Adabiy anjuman press-relizi

“Ma’rifat ulashib” loyihasi doirasida O‘zbekiston Yozuvchilar uyushmasi a’zosi Rahmon Qo‘chqor bilan uchrashuv

PRESS-RELIZI

Joriy yilning 16-dekabr kuni Xalqaro Nordik universitetida ezgulik, axloqiy g‘oyalar targ‘ibotiga asoslangan “Ma’rifat ulashib” loyihasi doirasida navbatdagi adabiy uchrashuv o‘tkazildi.

Adabiyotshunos, “Shuhrat” medali, “Xalq ta’limi a’lochisi” ko‘krak nishoni sohibi, “Iste’dod qadri”, “Men bilan munozara qilsangiz”, “Qarz berilgan nur” asarlari va eng yaxshi adabiy ko‘rsatuv - “Hayrat”ning muallifi  Rahmon Qo‘chqor uchrashuv mehmoni bo‘ldi. 

Respublikamizning eng yirik ma’naviyat targ‘ibotchilaridan biri bo‘lgan taniqli olim anjumanda talaba-yoshlar ma’naviyatini yuksaltirish, ular o‘rtasida kitobxonlikni targ‘ib qilish, mutolaa madaniyatini oshirishga e’tibor qaratdi.

Rahmon Qo‘chqor badiiy ijod va jurnalistikaga ishtiyoqi baland talabalar bilan muloqot qilib, zamondosh ijodkorlarning yangi kitoblari, adabiy evrilishlar va xalq tafakkuri haqidagi boy mulohazalarini yoshlarga yetkazdi. Prezident devoni, Vazirlar Mahkamasidagi faoliyat yillariga to‘xtalib, yoshlar ta’lim-tarbiyasini oqsoqlikdan olib chiqish, rivojlantirish jarayonlaridagi sa’y-harakatlari borasida so‘zladi. 

Uchrashuvda ijtimoiy hayot shaklimiz, axloq normalari va madaniy merosimizga keng nazar solindi. Talabalar xalqimiz, millatimizni hurmatlash, o‘z vazifalarini halol bajarish va birlashishga undaldi. Shuningdek, olim o‘z nutqida o‘zbek she’riyatidagi istiqlol, erkin ruh, millatni yaxlit qilib, birlashtiradigan va kelajak sari yol ko‘rsatuvchi adabiyot xususida keng to‘xtaldi.

Rahmon Qo‘chqor Nordik talabalariga kitob mutolaasiga yanada yaqinlashtiruvchi omillarni sanab o‘tdi. Zero, ılmli yoshlargina mamlakat taraqqiyotining kafolatidir.

Anjuman davomida Nordik “Talabalar teatr studiyasi” a’zolari yangi spektakl - “Qadam” (ssenariy muallifi va rejissyorlar - Shodiyor Niyatqobilov, Laziz Rustamov) sahna asarini mahorat bilan ijro etdilar. Spektakl tomoshabinlarni giyohvandlik illatining asoratlari, bugun qo‘yilayotgan har bir qadam ertaga, albatta yaxshi yoki salbiy natijasini ko‘rsatishi va vaqt ne’matini qadrlash borasida chuqur mulohazalarga undadi.

"Ma’rifat ulashib" tadbiri press-relizi

"Ma’naviyat jamiyatdagi barcha siyosiy-ijtimoiy munosabatlarning mazmuni va sifatini belgilaydigan poydevordir. Bu poydevor qancha mustahkam bo‘lsa, xalq ham, davlat ham shuncha mustahkam bo‘ladi" 

                                                    Shavkat Mirziyoyev 

Joriy yilning 13-dekabr kuni Xalqaro Nordik universitetining ma’rifatchilar guruhi yoshlar bilan muloqot qilish uchun yo‘l oldilar. Xususan, "Ma’rifat ulashib" loyihasi doirasida XNU kafedralari professor-o‘qituvchilari, O‘zbekiston Yozuvchilar uyushmasi a’zolari: Raxmon Qo’chqor, Sitora Shomurodova, musiqa ta’limi bo’yicha ekspert, pedogogika fanlari doktori, professor Qurbonniyoz Panjiyev va boshqa bir qator ma’naviyatchilar Sirdaryo viloyatining Boyovut tumaniga tashrif buyurdilar. 

Tashrifdan ko‘zda tutilgan maqsad, o‘quvchilar bilan suhbat uyushtirish, yurtimizdagi yoshlar siyosati va ta’limga oid islohotlardan xabardorlik darajasini oshirish, ularning badiiy savodxonligini yuksaltirish, ijodkorlik va faollikka undash, kitob mutolaasiga chorlash, muhimi yurtimiz kelajagiga daxldorlik ruhida tarbiyalashdir.

Tumandagi 50-umumiy o‘rta ta’lim maktabiga tashrif davomida ta’lim muassasasi kutubxonasida Xalqaro Nordik universiteti burchagi ochildi. Universitet tomonidan tuhfa etilgan o‘quv jihozlari va kitoblar topshirildi.

Shundan so‘ng, Maktabgacha va maktab ta’limi bo‘limi vakillari, maktab rahbariyati va o‘quvchilar ishtirokida ma’naviy-ma’rifiy tadbir o‘tkazildi. Unda XNU Akademik ishlar bo‘yicha prorektori M.Amonboyev o‘quvchilarni yurtimizda yoshlar uchun yaratilayotgan sharoitlar, universitet faoliyati va ta’lim imkoniyatlari bilan tanishtirdi. U o‘z ma’ruzasida ta’limda ma’rifatning o‘rniga keng to‘xtaldi. 

O‘zbekiston Yozuvchilar uyushmasi a’zosi, adabiyotshunos olim Raxmon Qo’chqor, filologiya fanlari bo‘yicha falsafa doktori Sitora Shomurodova o‘quvchi-yoshlar bilan adabiy suhbat qurdi. U o‘z ma’ruzasida adabiyot namoyandalari va kitobxonlik madaniyatiga e’tibor qaratdi. She’riyatning komil inson konsepsiyasida tutgan o‘rnidan kelib chiqib, o‘quvchi-yoshlarning mutolaa va ijodkorlikka qiziqishlarini oshirdi. 

Uchrashuvda “Nordik taronasi” ansambli ijodkorlari kuy-qo‘shiqlari orqali estetik zavq ulashdilar. Ular o‘zlarining badiiy chiqishlari bilan davraga fayz bag‘ishladilar. 

Karl Gustaf Mannergeym fotosuratlari ko‘rgazmasi press-relizi

Joriy yilning 29 noyabr kuni Finlyandiya tashqi ishlar vazirligi, Finlyandiyaning O‘zbekistondagi faxriy konsulligi va Xalqaro Nordik universiteti hamkorligida “Osiyo bo‘ylab – Gʻarbdan Sharqqa 1906-1908 yillar, Karl Gustaf Mannergeym fotosuratlari" ko‘rgazmasining ochilish marosimi o‘tkazildi.

Buyuk fin sayyohi, davlat va jamoat arbobi Karl Gustav Emil Mannergeym ko‘rgazmasining ochilishida Finlyandiyaning Markaziy Osiyodagi favqulodda va muxtor elchisi Ilkka Raisanen, finlyandiyalik yuqori martabali mehmonlar, diplomatik korpus va hukumatimiz vakillari ishtirok etdilar.

Ochilish marosimida Finlyandiyaning Markaziy Osiyodagi favqulodda va muxtor elchisi Ilkka Raisanen Mannergeym Finlyandiya uchun muhim yetakchi ekanligini e’tirof etib, bu ko‘rgazma Markaziy Osiyo va Xitoyda 1906-1908 yillarda yashagan insonlar va ularning hayotiga keng nazar tashlash imkonini berishini ta’kidladi.

Ko‘rgazma kuratori Peter Sandberg ishtirokchilarni noyob fotosuratlar bilan tanishtirib, har biri bilan bog‘liq voqealarni batafsil bayon qildi. Mannergeymni suratga olish, madaniyatlarni qog‘ozlarga muhrlab, kolleksiya yaratishda ko‘rinmas qahramon bo‘lganligini e’tirof etib o‘tdi.   

Ko‘rgazma kamera yordamida olingan oq-qora fotosuratlarni o‘zida jamlagan bo‘lib, ular Mannergeym tomonidan 1906-1908 yillarda Buyuk Ipak yo‘li bo‘ylab Osiyo orqali Turkistondan Pekinga otda sayohat qilingan davrda olingan. Ko‘rgazma qatnashchilari mahalliy aholining hozirgi vaqtda sezilarli darajada yo‘qolgan yoki o‘zgargan madaniyati va kundalik hayotini o‘zida aks ettirgan ushbu fotosuratlarni katta qiziqish bilan tomosha qildilar. Zero, ushbu fotosuratlar kundalik mashaqqatli mehnatdan tortib bayramlargacha bo‘lgan 100 yil avvalgi hayotni aks ettiradi.

Xalqaro Nordik universitetida “Osiyo bo‘ylab – Gʻarbdan Sharqqa” ko‘rgazmasi tashrif buyuruvchilar uchun 2025-yilning 2-fevraliga qadar ochiq bo‘ladi. 

Ma’lumot o‘rnida, 1906-yilda 38 yoshli polkovnik Karl Gustav Emil Mannergeym Rossiya armiyasi Bosh shtabi Boshqarmasining topshirig‘iga ko‘ra, Turkistondan Pekinga Xitoy orqali harbiy-geografik ekspedisiyani amalga oshirishga kirishdi. Ekspedisiyaning vazifasi, ayniqsa chegaradosh viloyatlardagi dolzarb siyosiy va harbiy ma’lumotlarni yig‘ishdan iborat bo‘lgan. U Sankt-Peterburgdan poyezdda Bokuga va u yerdan Kaspiy dengizini kesib o‘tib, o‘zining asosiy manzillariga yo‘l oldi.

O‘zini tadqiqotchi sifatida tanishtirgan Mannergeym dastlab mashhur fransuz kinologi Pol Pellio bilan sayohat qilgan, ammo keyin ularning yo‘llari ajralgan. U ikki yildan ortiq vaqt davomida kichik jamoasi bilan asosan otlarda 14 000 kilometrdan ziyod yo‘l bosib, ko‘plab qiyinchiliklarga duch kelgan. 

Mannergeymning ekspedisiyasi faqat razvedka vazifasini emas, balki ilmiy maqsadlarni ham o‘z ichiga olgan. U arxeologik va etnografik artefaktlar, qadimgi qo‘lyozmalar to‘plagan hamda o‘sha davr va madaniyatlar haqida noyob tasavvur beradigan suratlarni tasvirga olgan. Bu tasvirlarda Markaziy Osiyo va Xitoy xalqlari hamda ularning turmush tarzi yozib olingan, natijada yo‘qolib borayotgan madaniyatlar kelajak avlodlar tanishishi uchun saqlab qolingan. 

Mannergeymning tadqiqotchi sifatida ko‘p qirraliligi uning portret va hujjatli suratlarida, ayniqsa yaqqol namoyon bo‘ladi. Ushbu tasvirlarda odamlar va ularning madaniyatlariga hurmat, diqqat bilan yondashuv aks etgan. Uning bu suratlari avvaliga harbiy hisobotlari soyasida qolgan bo‘lsa-da, o‘n yillar o‘tib yuqori baholangan va 2000 yillar boshidan turli shaharlarda ko‘rgazmalarda namoyish etilgan.

Fotosuratlarning ba’zilarida tog‘ yo‘llari, daryolar va yo‘llar tasvirlanib, harbiy-strategik ahamiyatga ega bo‘lgan. Biroq aksariyat rasmlar etnografik tadqiqot doirasida olingan. Ularda uyg‘ur, qalmiq, torg‘ut, yugur, qirg‘iz va tangutlar hayoti va madaniyati aks etgan. Mannergeymning fotoarxivi bir asrdan ortiq vaqt davomida o‘zgarib yoki yo‘qolib ketgan dunyo haqidagi noyob hujjatdir.

Fotograf sifatida Mannergeym, ayniqsa portretlar yaratishda muvaffaqiyatga erishgan. Kamerani birinchi marta ko‘rayotgan insonlar bilan ishlashda ham u ishonchli munosabat o‘rnatib, tabiiy va jonli kadrlarni yarata olgan. Portretlardan tashqari, uning ishida reportaj fotosuratlari ham muhim o‘rin egallaydi. U cho‘ldagi poygalar, dafn marosimlari, ko‘cha sahnalari, ustaxonalar, bayramlar va kundalik hayotni hujjatlashtirgan. Uning uslubi zamonaviylik kasb etib, voqealarga aralashmasdan kuzatuvchi sifatida ish olib borgan. Fotosuratlar O‘rta Osiyo xalqlarining bundan yuz yil avvalgi hayoti va turmush tarzi haqida hikoya qiladi va tarix va madaniyatni o‘rganish uchun noyob material hisoblanadi.

Euronews delegatsiyasi tashrifi press-relizi

Joriy yilning 19-noyabr kuni Xalqaro Nordik universiteti “Uzreport jurnalistika, media va kommunikatsiyalar akademiyasi”ga Euronews mediaxoldingi direktorlar kengashi raisi Pedro Vargas David boshchiligidagi delegatsiya tashrif buyurdi.

Mamlakatimizda professional jurnalist kadrlar tayyorlovchi va jurnalistlarning malakasini oshiruvchi zamonaviy platforma sifatida tashkil etilgan “Uzreport jurnalistika, media va kommunikatsiyalar akademiyasi” va Euronews mediaxoldingi hamkorligi borasida muzokara o‘tkazildi. Hamkorlik istiqbollari xususida so‘z borgan muzokarada Euronews mediaxoldingi direktorlar kengashi raisi Pedro Vargas David, direktorlar kengashi kotibi Fernando Soares, mediaxolding Xalqaro savdo direktori Kelly Styne, “Alpac Capital” investitsiyalar guruhining Markaziy va Sharqiy Yevropa bo‘yicha direktori Peter Vajay va guruh moliyaviy maslahatchisi Afonso Guerra ishtirok etdilar.  

Nordik universiteti va UZREPORT Axborot agentligi hamkorligida ochilgan "UzReport jurnalistika, media va kommunikatsiyalar akademiyasi" Jurnalistika yo‘nalishi va mutaxassisligi talabalariga dual ta’lim imkoniyatlari va zamonaviy istiqbollar taqdim etishi mehmonlarda katta qiziqish uyg‘otdi. Jamoaviy loyihalar, xorijiy ekspert-jurnalistlardan “mahorat darslari”, binar ma’ruzalar uyushtirish va stajirovka masalalarida fikr almashildi.  

Shundan so‘ng euronews jamoasi va Akademiyada Jurnalistika ta’lim yo‘nalishi va mutaxassisligi bo‘yicha ta’lim olayotgan talabalar, ilmiy izlanuvchilar va professor-o‘qituvchilar o‘rtasida uchrashuv tashkil etildi. Nufuzli mehmon Pedro Vargas Devidga UzReport jurnalistika, media va kommunikatsiyalar akademiyasining “Faxriy professori” ilmiy unvoni taqdim etildi. 

Uchrashuv tabrik va qutlovlar, qiziqarli ma’lumotlar almashish va muloqot ruhida o‘tdi.

Shuningdek, o‘z platformalarida jahon auditoriyasiga Yangi O‘zbekistonni keng tanitayotgan euronews rahbariyati yurtimizda jamiyat hayotining barcha jabhalarida keng ko‘lamli o‘zgarishlar amalga oshirilayotgani va Markaziy Osiyo mintaqasida muhim o‘rin tutayotganini e’tirof etib o‘tdi. “O‘zbekistondan taklifnomalar” turkumida o‘zbek san’ati, madaniyati va turmush tarzini o‘rganuvchi teleko‘rsatuvlar muntazam efirga berib borilishi, yurtimizning boy sayyohlik salohiyati va madaniy merosini targ‘ib qiluvchi axborot kampaniyasini yanada kengaytirishga qaratilgan loyihalar amalga oshirilayotgani ta’kidlandi.   

Tashrif so‘nggida yuqori martabali mehmon Nordik “Dil izhorlari” kitobida iliq tilaklarini yozib qoldirdi.

Yevropa Ittifoqi – Markaziy Osiyo yosh yetakchilar konferensiyasi press-relizi

 “Yevropa Ittifoqi – Markaziy Osiyo yosh yetakchilar konferensiyasi: Barqaror suv harakati paradigmasini o‘zgartirish” mavzusida Toshkent shahrida o‘tkazildi

2024-yil 30-31-oktabr kunlari “Yevropa Ittifoqi – Markaziy Osiyo yosh yetakchilari konferensiyasi: Barqaror suv harakati paradigmasini o‘zgartirish” mavzusidagi mintaqaviy konferensiya o‘tkazildi. Konferensiya O‘zbekistonning Toshkent shahrida bo‘lib o‘tdi.

Konferensiya Yevropa Ittifoqining Markaziy Osiyo boʻyicha maxsus vakili va Xalqaro Nordik universiteti tomonidan Oʻzbekiston Respublikasi Yoshlar ishlari agentligi hamda “UzReportTV” axborot agentligi bilan hamkorlikda tashkil etildi.

Konferensiya suv resurslarini boshqarish va odamlar o‘rtasidagi aloqalarning muhim mavzulari bo‘yicha “Yevropa Ittifoqi – Markaziy Osiyo” Yo‘l xaritasini amalga oshirishni qo‘llab-quvvatlagan holda Markaziy Osiyoning beshta davlatidan 35 yoshgacha bo‘lgan 100 nafarga yaqin ishtirokchini o‘zida jamladi. Jumladan, talabalar, tashabbuskor yoshlar, fuqarolik jamiyati tashkilotlari, tadqiqotchilar, ommaviy axborot vositalari, yosh siyosatchilar, shuningdek, hukumat ekspertlari vakillari ishtirok etdilar.

Konferensiya ochilishida O‘zbekiston Respublikasi Suv xo‘jaligi vaziri Shavkat Hamroyev, Qozog‘iston Respublikasi Prezidenti maslahatchisi Zulfiya Suleymenova, Tojikiston Respublikasi Energetika va suv xo‘jaligi vazirining birinchi o‘rinbosari Jamshed Shoimzoda nutq so‘zladilar.  

Konferensiyada Yevropa Ittifoqiga aʼzo davlatlar elchilari, Birlashgan Millatlar Tashkiloti va Jahon sogʻliqni saqlash tashkiloti vakillari, shuningdek, YXHTning Oʻzbekistondagi vakillari ishtirok etdilar. Konferensiyada Yevropa Ittifoqining Markaziy Osiyodagi delegatsiyalari vakillari ham ishtirok etdilar.

Yevropa Ittifoqi – Markaziy Osiyo yosh yetakchilari konferensiyasi Markaziy Osiyoning yosh liderlarini mintaqaviy hamkorlikka jalb qilish va ularni tinglash, Yevropa Ittifoqi – Markaziy Osiyo kun tartibini ilgari surishda ishtirok etishni targ‘ib qilish imkoniyatini berdi. Xususan, Barqaror suv harakatiga e’tiborlari jalb qilindi. Konferensiya Markaziy Osiyo va mintaqalar bo‘ylab mintaqaviy muloqot va sheriklikni kuchaytiradi, shuningdek, Yevropa Ittifoqining jamoatchilikka ta'siri va ko‘rinishini oshiradi, iqlim barqarorligi va suv resurslarini boshqarish bo‘yicha harakatlarini tushunishni ta’minladi.

Konferensiya Ochilish, Oliy darajali panel va Barqaror suv harakati boʻyicha Yevropa Ittifoqi – Markaziy Osiyo hamkorligi hamda Markaziy Osiyodagi suv inqirozini hal qilishda yoshlarning roliga bagʻishlangan ikkita tematik sessiyadan iborat boʻldi. Bundan tashqari, Konferensiya bir nechta interaktiv seminarlarni o‘z ichiga oldi, ular davomida ishtirokchilar suvdan foydalanish samaradorligi, tejamkorlik va suv diplomatiyasi kabi o‘zaro manfaatli suvga oid mavzularni muhokama qildilar.

Shuningdek, “Toshkent irrigatsiya va qishloq xo‘jaligini mexanizatsiyalash muhandislari instituti” Milliy tadqiqot universitetining tajriba maydoniga (Suvchilar maktabi) ekskursiya o‘tkazildi, bu esa ishtirokchilarga amaliy tajriba orttirish imkonini berdi.

Ushbu noyob konferensiya Markaziy Osiyoning yosh yetakchilari uchun suv bilan bog‘liq muammolar bo‘yicha o‘z nuqtai nazarlarini bildirish uchun platforma bo‘lib xizmat qildi va ko‘plab sohalarda hamkorlik va fikr almashishga yordam berdi.

Yevropa Ittifoqining Markaziy Osiyo bo‘yicha maxsus vakili ofisi

"Work and travel" press-relizi

Ma’lumki, Xalqaro Nordik universiteti yurtimiz ta’lim islohotlariga hissa qo‘shish maqsadida Shimoliy Yevropa davlatlari, xususan Finlandiyaning qator nufuzli universitetlari bilan hamkorlik qilmoqda. XNUda Finlyandiya bilan hamkorlikda 2023 yilning sentyabr oyidan 3 ta ta’lim yo‘nalishi, xususan “Sanoat menejmenti”, “Xalqaro biznes” va “Axborot kommunikatsiya texnologiyalari” bo‘yicha DOUBLE DEGREE dasturining amaliyotga joriy etilishi belgilangan.  

XNUda ta’lim jarayoni fin modeli, Finlyandiyaning Kareliya amaliy fanlar universiteti bilan tuzilgan "1+3" va "2+2" kabi dasturlar asosida amalga oshiriladi. Talabalarimizga ta’lim dasturi tanlovlari asosida ushbu xorijiy universitetda ta’lim olish imkoniyati taqdim etiladi. 

Shuningdek, talabalarimiz uchun ish va sayohat dasturi asosida yozgi ta’tilni Finlandiyada o‘tkazish imkoniyati yaratilmoqda. Ayni paytda universitetimizning bir guruh talabalari ana shunday xalqaro imkoniyatlarimizdan unumli foydalanmoqdalar. Bir guruh talabalarimiz ustozlar boshchiligida "Work and travel" dasturi asosida Finlyandiyadalar. Ularni Karelia UAS ko‘p tarmoqli xalqaro va innovasion universitet prezidenti Petri Raivo kutib olib, universitetning o‘ziga xos kampusi, Joyensuu ilmiy parki, Finlandiya kutubxonalarining faoliyati va boshqa o‘ziga xosliklar bilan tanishtirdi.  

18 iyun kuni navbatdagi delegatsiya – ustozlar boshchiligidagi bir guruh talabalar 3 oyga Finlyandiyaga yo‘l olmoqdalar. Professionallik va daromad sari yo‘l sanalgan "Work and travel" dasturi asosida Finlyandiyaga yo‘l olmoqdalar. Ushbu dastur kasbiy bilimlarni egallash, fin, shved va turfa madaniyat hamda qadriyatlar almashish bilan ham alohida ahamiyat kasb etadi. Qolaversa, bu fusunkor yurtning mo‘jizakor ne’matlari bilan tanishiladi. 

17-iyun kuni Finlandiya safari oldidan uchrashuv o‘tkazildi. Dastur doirasida universitetimiz hamkori bo‘lgan O‘zbekiston Respublikasi Tashqi mehnat migratsiyasi agentligining ekspertlari tashrif buyurdilar va Finlandiyaga ketayotgan talabalarga o‘z maslahatlari, kerakli tarqatma materiallar taqdim etishdi. 

Bu uchrashuv talabalarni chet davlatga borib, adaptatsiya bo‘lishlari, mehnat va sayohatlarini to‘g‘ri amalga oshirishlari uchun juda katta yordam beradi.  vbds

"Work and travel" dasturi bo‘yicha Finlyandiyaga yo‘l olayotgan talabalarni tabiiy o‘rmonlar, ajoyib baliq ovlari va mavjli ko‘llarda qayiqlarda sayr qilish zavqi kutmoqda! 

Finlyandiyada ushbu dastur bo‘yicha bo‘lib turgan vakillarimizning ma’lumot berishlaricha, mamlakatda qishloq xo‘jaligi va o‘rmonchilik keng rivojlangan. O‘rmon xo‘jaligi mamlakat iqtisodiyotining qadimiy tarmog‘i sanaladi. Bioiqtisodiy yondashuvlarni sanoat amaliyotiga joriy etadigan kadrlar tayyorlashda Finlandiya tajribalarini o‘rganish qo‘l keladi.