Yangiliklar
Sergey Stanovkindan master-klass: mamlakat brendini yaratishda OAVning o‘rni
February 24 , 2025
1603
Xalqaro Nordik universiteti “Uzreport jurnalistika, media va kommunikatsiyalar akademiyasi”ga BBCning Yevrosiyo bo‘yicha tijorat vakillari boshlig‘i, "European News Academy" va "Dars consulting" direktori Sergey Stanovkin tashrif buyurdi.
BBC tahririyatining tajribali vakili bilan Jurnalistika yo‘nalishi va mutaxassisligi talabalarining uchrashuvi tashkillandi. Talabalar bilan muloqotda Sergey Stanovkin xalqaro OAV va kommunikatsiyalar sohasidagi tajribalari, tijoriy televizion dasturlarni boshqarish mahorati, global hamkorliklarning innovatsion imkoniyatlarini targ‘ib etish bo‘yicha ko‘nikmalarini yetkazdi.
Maʼruzachi stereotiplar masalasiga to‘xtalib, ularni o‘rganish va shakllantirish juda muhimligini eʼtirof etdi. Stereotiplar bilan kurashish qiyinligi, ammo ko‘pincha ulardan foydalanish mumkinligini qayd etib o‘tdi.
Uchrashuvda talabalarga qator OAVlarning brend yaxlitligi va nufuzi darajalari bo‘yicha ham tadqiqiy maʼlumotlar taqdim etildi. Ishonchlilik va obro‘ darajalari, ularning jamoatchilik orasida qabul qilinishi diagrammalar asosida sharhlab berildi.
"Davlat kommunikatsiyalari, xususan mamlakat brendi va investitsiyalarni targ‘ib qilish sohasida xodimlarning shaxsiy malakasi muvaffaqiyat omili hisoblanadi. Bu shunchaki axborotni ishlab chiqish va tarqatish emas, balki strategik kommunikatsiyalar sanʼatini egallash va umumiy brend maqsadlariga muvofiq harakat qilishni anglatadi.
Jurnalistning intervyu jarayonida shaxsiy muloqot ko‘nikmalari, qiyin savollardan qochish qobiliyati ham davlatning PR faoliyatiga bevosita taʼsir ko‘rsatadi. Intervyu jarayonida faqatgina axborotni chuqur tahlil qilish emas, balki materialni ijodiy taqdim etish ham muhim.
Axborot muhitini to‘g‘ri baholash, OAV platformalarini to‘g‘ri tanlash va ulardan unumli foydalanish, tezkor tahlil qilish, tekshirish va eng samarali formatda yetkazish qobiliyati muhimdir.
Soxta yangiliklar mamlakat imidjiga putur yetkazishi mumkin bo‘lgan zamonda jurnalistning axborotni tez va aniq tekshirish, tasdiqlash va yolg‘on maʼlumotlarga qarshi kurashish qobiliyati juda muhimdir", dedi Sergey Stanovkin.
Muloqotda OAV platformalarini tahlil qilish, ularning miqdoriy va sifat jihatlarini hisobga olish muhimligi ham taʼkidlandi. Media strategiyasida muvaffaqiyat moddiy va nomoddiy omillarning uyg‘unligiga bog‘liqligi, OAV manbasining ishonchliligi ko‘pincha xabardagi yangilikdan ham ko‘proq ahamiyat kasb etishi aytib o‘tildi.
Shuningdek, tomoshabinlarning turli brendlar, masalan BBC World News, Bloomberg, CNBC, CNNni tomosha qilishi va qanday qabul qilayotgani turli indikatorlar asosida tahlil qilindi. Jumladan, ishonchli, taʼsirli, rag‘batlantiruvchi, doim birinchi xabardor qiluvchi, majburiy ko‘riluvchi kabi indikatorlarda har bir brendning qadriyatlari aks etishi maʼlum qilindi.
Muloqot davomida maʼruzachi turli mamlakatlarning kelajak brendlarini yaratishda ahamiyatli jihatlar bo‘yicha ham tajribalari bilan bo‘lishdi. Norvegiya, Germaniya kabi qator davlatlarning o‘ziga xosligi ochib berilgan videomateriallar namoyish etildi.
Mamlakat brendining global ijtimoiy media muloqotlarida tilga olinishi, ilg‘or texnologiyalari, merosi va madaniyati, turmush darajasi, qaysi sohalarda eng tajribali ekanligi, tabiiy go‘zalligi, ekologik standartlarga muvofiqligi borasidagi aniq, tahliliy maʼlumotlardan foydalanish maqsadga muvofiqligini aytib o‘tildi.
Britaniyaning DARS FILMS studiyasi tomonidan Qozog‘iston Tashqi ishlar vazirligi buyurtmasi asosida tayyorlangan 90 soniyali mini-filmdan ayrim lavhalar namoyish etildi. Film asosida zamonaviy Qozog‘istonning rivojlanish tarixi, raqobatdosh afzalliklari va yutuqlarini taqdim etish uslublariga nazar solindi. O‘tmish va hozirgi kun uyg‘unligi orqali mamlakatning dinamik rivojlanishi ochib berilib, mamlakat kelajak brendi ulkan rivojlanish salohiyatiga ega sifatida ko‘rsatildi.
Maʼruzada mamlakat imidji va brendini tanitishda jurnalistlar oldida turgan maqsad, vazifalar, yechimlar har jihatdan ochib berildi.
Master-klassda globalizatsiya va raqamli transformatsiya davrida audiovizual OAVning kelajagiga keng nazar tashlandi. Talabalar o‘zlarini qiziqtirgan ko‘plab savollarga javoblar oldilar.
BBCning televideniye, radio xizmatlari va veb-sayt kontentlari yaratishdagi mukammal tajribalari talabalar, jurnalistlar tayyorlovchi o‘qituvchilar uchun o‘ziga xos tajriba maktabi vazifasini o‘tashi va bu borada BBC Xalqaro Nordik universiteti “Uzreport jurnalistika, media va kommunikatsiyalar akademiyasi” bilan hamkorlikka tayyorligi maʼlum qilindi.
Universitet rahbariyati tomonidan Sergey Stanovkinga Xalqaro Nordik universiteti Faxriy professori unvoni topshirildi.
Nufuzli mehmon Nordik dil izhorlari kitobiga iliq fikrlarini yozib qoldirdi.
So'nggi yangiliklar
Toshkent xalqaro investitsiya forumi: O‘zbekiston global iqtisodiyot xaritasida
Mazkur maqolada O‘zbekistonning jahon iqtisodiyotidagi yangi o‘rni, investitsiyaviy jozibadorligi va iqtisodiy islohotlar natijalari ilmiy-tahliliy yoritilgan.
Toshkent xalqaro investitsiya forumi oldidan ushbu nufuzli anjumanning mohiyati ochib berilgan. Forum Markaziy Osiyoning eng yirik investitsion maydonlaridan biriga aylanib, global investorlar, xalqaro moliya institutlari va biznes vakillarini bir nuqtada jamlayotgani qayd etilgan.
Forumning 2026-yildagi mavzusi — “Investitsiya barqarorligi: yangi ufqlar, yangi sherikliklar” bo‘lib, bugungi global iqtisodiy noaniqliklar sharoitida kapitalni himoya qilish va yangi hamkorlik mexanizmlarini shakllantirishga qaratilgan.
Maqolada forum mamlakatning global iqtisodiy tizimdagi o‘rnini mustahkamlovchi strategik platforma sifatida talqin qilingan.
Muallif bunga bir nechta omillarni sabab sifatida ko‘rsatgan. Maqolaning batafsil mazmuni bilan "Yangi O‘zbekiston" gazetasining 6-iyun kungi sonida tanishishingiz mumkin.
Universitet — texnopark — startap ekotizimi: talabalar uchun laboratoriyadan biznesgacha
Innovatsion o‘quv-ishlab chiqarish texnoparkiga tashrif davomida loyihalar va g‘oyalarni amalga oshirish va rivojlantirish uchun yaratilgan barcha sharoitlar ko‘zdan kechirildi. Yuqori texnologiyali mashina va uskunalar bilan jihozlangan ishlab chiqarish, ofis va kovorking, VR zonalari, biotexnologik va standartlashtirish laboratoriyalari, mashhur jahon brendlari KUKA va FANUC sanoat robotlari bilan jihozlangan elektronika va robototexnika zonalarida innovatsion infratuzilma bilan tanishildi.
Quvonchlisi, Nordik universitetining “Bo‘lajak olim” ilmiy g‘oyalar tanlovi g‘oliblariga Sertifikatlar topshirildi, "Mirzo Ulug‘bek vorislari" respublika tanlovi g‘olibi bo‘lgan talabamizga vaucher taqdim etildi.
Tashrif natijasida Xalqaro Nordik universiteti va “INNO" texnopark shuningdek, O‘zbekiston Respublikasi Oliy ta’lim, fan va innovatsiyalar vazirligi huzuridagi Yoshlarning innovatsion tashabbuslarini qo‘llab-quvvatlash ofisi rahbariyatlari o‘rtasida hamkorlik memorandumlari imzolandi.
Bugungi kunda zamonaviy universitetlarning muvaffaqiyati faqat auditoriyadagi ta’lim bilan emas, balki ilm-fan, innovatsiya va ishlab chiqarish integratsiyasi bilan baholanadi. Imzolangan memorandumlarda aynan shu jihatlarga ahamiyat qaratildi.
Talabalar texnopark laboratoriyalari, robototexnika markazlari, zamonaviy texnik bazalar va ishlab chiqarish maydonlarida amaliyot hamda stajirovka o‘tash imkoniyatiga ega bo‘ladilar. Bu orqali real kasbiy tajriba uchun ta’lim olish modeli yanada shakllantiriladi.
Hamkorlik doirasida sun’iy intellekt, robototexnika, 3D modellashtirish, dasturlash va innovatsion muhandislik yo‘nalishlarida qo‘shma loyihalar amalga oshiriladi. Bu esa Nordik talabalarining mehnat bozorida talab yuqori bo‘lgan kompetensiyalarni kengroq egallashiga xizmat qiladi.
Shuningdek, “g‘oya–tadqiqot–prototip–startap–mahsulot” zanjiri talabalarning innovatsion fikrlarini real biznes va texnologik mahsulotga aylantirish imkoniyatini yaratadi. Bu esa oddiy loyihagina emas, kelajakdagi texnologik kompaniyalar uchun poydevor vazifasini bajaradi.
Kelgusida grant loyihalari, xalqaro dasturlar, xakatonlar, tanlovlar va ilmiy tashabbuslarda hamkorlikda ishtirok etishga kelishildi. Nordik talabalari uchun nafaqat mahalliy, balki xalqaro innovatsion maydonga chiqish imkoniyatlarini kengaytirish uchun muhim kelishuvlarga erishildi.
Hamkorlik maqsadlarida patentlar, foydali modellar, innovatsion mahsulotlar yaratish hamda ularni amaliyotga joriy etish va tijoratlashtirish mexanizmlari ham nazarda tutilib, kelgusida talabalar va yosh tadqiqotchilarning ilmiy ishlanmalari iqtisodiy qiymat kasb etishiga asos qo‘yildi.
Mazkur hamkorliklar Nordik universitetining ta’lim modelini yangi bosqichga olib chiqadi. Endilikda talabalar uchun faqat bilim oluvchi emas, ilmiy tadqiqotchi, startap asoschisi, innovator va texnologik loyihalar ishtirokchisiga aylanish imkoniyati yanada kengayadi.
Nordik delegatsiyasi Polshada muhim uchrashuvlarda
Delegatsiyamiz Polshaning nufuzli WSEI universitetida Erasmus+ KA171 Staff Mobility dasturi doirasida xizmat safarida bo‘ldi.
Tashrif davomida WSEI (Iqtisodiyot va innovatsiyalar) universiteti vice-rektori, professor Tomasz Wotowiec bilan uchrashuv o‘tkazilib, ikki oliy ta’lim muassasasi o‘rtasidagi hamkorlikning natijalari va istiqboldagi rejalar muhokama qilindi. Muloqotda qo‘shma ta’lim loyihalari, ilmiy tadqiqotlar, akademik almashinuv dasturlari hamda talaba va professor-o‘qituvchilar uchun yangi imkoniyatlar masalalariga alohida e’tibor qaratildi.
Shuningdek, Nordik vakillari WSEI talabalari uchun ma’ruza va amaliy mashg‘ulotlar o‘tkazib, o‘z bilim va tajribalari bilan o‘rtoqlashdilar.
E’tiborlisi, hamkorlik ikki tomonlama va izchil davom etmoqda. O‘tgan o‘quv yilida WSEI delegatsiyasi Nordik universitetiga tashrif buyurgan bo‘lsa, Nordikning faxrli talabasi Madinabonu Isaqova Erasmus+ KA171 ICM granti asosida WSEI universitetida muvaffaqiyatli tahsil oldi.
Javob tashrifi uchrashuvlarida esa ertangi hamkorlik loyihalarga poydevor qo‘yildi.
London fond birjasidagi yirik "IPO" — Yangi O‘zbekistondagi ortga qaytmas islohotlarning yana bir yorqin tasdig‘i
Muallif London fond birjasida amalga oshirilgan yirik "IPO" (aksiyalarni birlamchi ommaviy joylashtirish) misolida mamlakatning global kapital bozori sari qat’iy qadam tashlayotganini dalillar, ekspert fikrlari va xalqaro investorlar munosabati orqali ochib bergan.
Maqolaning e’tiborli jihatlaridan biri unda "IPO" O‘zbekistonning ochiqlik, investitsion jozibadorlik va iqtisodiy modernizatsiya yo‘lidagi muhim burilishi sifatida talqin qilingan. Ayniqsa, dunyoning eng yirik investitsiya gigantlari — BlackRock, Franklin Templeton singari kompaniyalar qiziqishi iqtisodiyotimizga bo‘lgan ishonch ramzi sifatida ko‘rsatilgan.
Muallif maqolada IPO mexanizmini oddiy o‘quvchi uchun ham tushunarli tarzda sharhlab, aksiyalar bozori, investorlar ishonchi, xalqaro reyting va kapital oqimi o‘rtasidagi uzviy bog‘liqlikni yoritib bergan. London fond birjasidagi listing O‘zbekiston iqtisodiyoti uchun “xalqaro ishonch sertifikati” vazifasini o‘tayotgani qayd etib o‘tilgan.
“IPO" nima beradi?”
“Nega London fond birjasi muhim?”
“Jamiyatimizga qanday ta’sir qiladi?”
Maqolada shu kabi savollarga aniq javoblar olish mumkin.
📰 Yangi O‘zbekistonning iqtisodiy islohotlari mohiyatini chuqurroq anglash uchun "Xalq so‘zi"ning 25-may kungi soni bilan tanishing.