Yangiliklar
Sergey Stanovkindan master-klass: mamlakat brendini yaratishda OAVning o‘rni
February 24 , 2025
394
Xalqaro Nordik universiteti “Uzreport jurnalistika, media va kommunikatsiyalar akademiyasi”ga BBCning Yevrosiyo bo‘yicha tijorat vakillari boshlig‘i, "European News Academy" va "Dars consulting" direktori Sergey Stanovkin tashrif buyurdi.
BBC tahririyatining tajribali vakili bilan Jurnalistika yo‘nalishi va mutaxassisligi talabalarining uchrashuvi tashkillandi. Talabalar bilan muloqotda Sergey Stanovkin xalqaro OAV va kommunikatsiyalar sohasidagi tajribalari, tijoriy televizion dasturlarni boshqarish mahorati, global hamkorliklarning innovatsion imkoniyatlarini targ‘ib etish bo‘yicha ko‘nikmalarini yetkazdi.
Maʼruzachi stereotiplar masalasiga to‘xtalib, ularni o‘rganish va shakllantirish juda muhimligini eʼtirof etdi. Stereotiplar bilan kurashish qiyinligi, ammo ko‘pincha ulardan foydalanish mumkinligini qayd etib o‘tdi.
Uchrashuvda talabalarga qator OAVlarning brend yaxlitligi va nufuzi darajalari bo‘yicha ham tadqiqiy maʼlumotlar taqdim etildi. Ishonchlilik va obro‘ darajalari, ularning jamoatchilik orasida qabul qilinishi diagrammalar asosida sharhlab berildi.
"Davlat kommunikatsiyalari, xususan mamlakat brendi va investitsiyalarni targ‘ib qilish sohasida xodimlarning shaxsiy malakasi muvaffaqiyat omili hisoblanadi. Bu shunchaki axborotni ishlab chiqish va tarqatish emas, balki strategik kommunikatsiyalar sanʼatini egallash va umumiy brend maqsadlariga muvofiq harakat qilishni anglatadi.
Jurnalistning intervyu jarayonida shaxsiy muloqot ko‘nikmalari, qiyin savollardan qochish qobiliyati ham davlatning PR faoliyatiga bevosita taʼsir ko‘rsatadi. Intervyu jarayonida faqatgina axborotni chuqur tahlil qilish emas, balki materialni ijodiy taqdim etish ham muhim.
Axborot muhitini to‘g‘ri baholash, OAV platformalarini to‘g‘ri tanlash va ulardan unumli foydalanish, tezkor tahlil qilish, tekshirish va eng samarali formatda yetkazish qobiliyati muhimdir.
Soxta yangiliklar mamlakat imidjiga putur yetkazishi mumkin bo‘lgan zamonda jurnalistning axborotni tez va aniq tekshirish, tasdiqlash va yolg‘on maʼlumotlarga qarshi kurashish qobiliyati juda muhimdir", dedi Sergey Stanovkin.
Muloqotda OAV platformalarini tahlil qilish, ularning miqdoriy va sifat jihatlarini hisobga olish muhimligi ham taʼkidlandi. Media strategiyasida muvaffaqiyat moddiy va nomoddiy omillarning uyg‘unligiga bog‘liqligi, OAV manbasining ishonchliligi ko‘pincha xabardagi yangilikdan ham ko‘proq ahamiyat kasb etishi aytib o‘tildi.
Shuningdek, tomoshabinlarning turli brendlar, masalan BBC World News, Bloomberg, CNBC, CNNni tomosha qilishi va qanday qabul qilayotgani turli indikatorlar asosida tahlil qilindi. Jumladan, ishonchli, taʼsirli, rag‘batlantiruvchi, doim birinchi xabardor qiluvchi, majburiy ko‘riluvchi kabi indikatorlarda har bir brendning qadriyatlari aks etishi maʼlum qilindi.
Muloqot davomida maʼruzachi turli mamlakatlarning kelajak brendlarini yaratishda ahamiyatli jihatlar bo‘yicha ham tajribalari bilan bo‘lishdi. Norvegiya, Germaniya kabi qator davlatlarning o‘ziga xosligi ochib berilgan videomateriallar namoyish etildi.
Mamlakat brendining global ijtimoiy media muloqotlarida tilga olinishi, ilg‘or texnologiyalari, merosi va madaniyati, turmush darajasi, qaysi sohalarda eng tajribali ekanligi, tabiiy go‘zalligi, ekologik standartlarga muvofiqligi borasidagi aniq, tahliliy maʼlumotlardan foydalanish maqsadga muvofiqligini aytib o‘tildi.
Britaniyaning DARS FILMS studiyasi tomonidan Qozog‘iston Tashqi ishlar vazirligi buyurtmasi asosida tayyorlangan 90 soniyali mini-filmdan ayrim lavhalar namoyish etildi. Film asosida zamonaviy Qozog‘istonning rivojlanish tarixi, raqobatdosh afzalliklari va yutuqlarini taqdim etish uslublariga nazar solindi. O‘tmish va hozirgi kun uyg‘unligi orqali mamlakatning dinamik rivojlanishi ochib berilib, mamlakat kelajak brendi ulkan rivojlanish salohiyatiga ega sifatida ko‘rsatildi.
Maʼruzada mamlakat imidji va brendini tanitishda jurnalistlar oldida turgan maqsad, vazifalar, yechimlar har jihatdan ochib berildi.
Master-klassda globalizatsiya va raqamli transformatsiya davrida audiovizual OAVning kelajagiga keng nazar tashlandi. Talabalar o‘zlarini qiziqtirgan ko‘plab savollarga javoblar oldilar.
BBCning televideniye, radio xizmatlari va veb-sayt kontentlari yaratishdagi mukammal tajribalari talabalar, jurnalistlar tayyorlovchi o‘qituvchilar uchun o‘ziga xos tajriba maktabi vazifasini o‘tashi va bu borada BBC Xalqaro Nordik universiteti “Uzreport jurnalistika, media va kommunikatsiyalar akademiyasi” bilan hamkorlikka tayyorligi maʼlum qilindi.
Universitet rahbariyati tomonidan Sergey Stanovkinga Xalqaro Nordik universiteti Faxriy professori unvoni topshirildi.
Nufuzli mehmon Nordik dil izhorlari kitobiga iliq fikrlarini yozib qoldirdi.
So'nggi yangiliklar
"Bitiruvchi-2025" tantanasi: katta hayot sari yangi qadamlar!
Tadbir muhtasham va tantanali ruhda boshlandi. Bayramona kechada universitetni tamomlagan bitiruvchilar – kecha qahramonlari o‘z o‘rnilarini egalladilar. Kechada ustozlar, bitiruvchilarning ota-onalari va yaqinlari ham quvonch, g‘urur va minnatdorchilik tuyg‘ulari bilan ishtirok etdilar.
Universitet hayoti aks etgan videorolikda talabalarning yorqin onlari jonlandi va barchaga bayramona kayfiyat, ajib taassurotlar bag‘ishladi.
Tantanali marosimda Davlat madhiyasi sadolari yangradi.
Shundan so‘ng tadbir boshlovchilari tabrik uchun Xalqaro Nordik universiteti rektori Sherzod Mustafakulov va O'zbekiston Yozuvchilar uyushmasi raisi, O'zbekiston Xalq shoiri, zamonaviy o'zbek she'riyatining atoqli vakili Sirojiddin Sayyidni sahnaga taklif qildilar. Bilim, fidoyilik va mehnatsevarlik bitiruvchilarning eng katta boyligi ekanligi e’tirof etildi. Yurtimiz ravnaqiga hissa qo‘shishga tayyor, zamonaviy tafakkur sohiblari – bitiruvchi-talabalarga samimiy tilaklar yo‘llanib, ularga kelgusidagi ilmiy, kasbiy faoliyatlarida muvaffaqiyatlar tilandi. Bugungi bitiruvchilar ertangi yetakchilar, jamiyat bunyodkorlari bo‘lishlariga chuqur ishonch bildirildi.
Tantanali daqiqalarda yuzlarida iftixor, ko‘zlarida quvonch aks etgan kecha qahramonlari – magistrlarga diplomlar topshirildi va gul tuhfa etildi.
Anjumanga tashrif buyurgan Alisher Fayz, Jenisbek Piyazov kabi sahna yulduzlari bitiruvchilarga jozibador kuy-qo‘shiqlari bilan o‘z tabriklarini yo‘lladilar.
Universitet dekanlari Elshod Umarov va Zulfiya Hamidovalar ham o‘z tabriklari va samimiy murojaatlarida bitiruvchilarning bilimga chanqoqligi, fidoyiligi va mehnatsevarligini alohida e’tirof etdilar.
Tabriknomalar va gullar bilan bakalavr-bitiruvchilarga ham quvonch ulashildi. Universitet prorektorlari barchani samimiy qutlab, eng ezgu tilaklarini bildirdilar.
Anjumanga tashrif buyurgan taniqli xonandalar, "Sado" guruhi ijodkorlari o‘zlarining betakror ijrolari bilan davraga fayz bag‘ishladilar.
Bayram kechasida so‘z olgan bitiruvchilar universitet jamoasiga o‘z minnatdorchiliklarini izhor etib, ustozlardan olgan bilim va ko‘nikmalari kelgusi hayotlarida mustahkam tayanch bo‘lishini e’tirof etdilar.
Kechaning eng hayajonli daqiqalarida universitet Madhiyasini hamma birgalikda kuyladi, har bir ishtirokchi Nordik jamoasining bir bo‘lagi ekanidan faxr hissini tuydi.
Ushbu unutilmas kecha Xalqaro Nordik universiteti jamoasi va bitiruvchilari uchun faxr va shukronalik bayramiga aylandi. Sahnada musiqa va raqslar bilan shodiyona davom etdi.
Bitiruv kechasi ma’lum yillik bilim va izlanishlarning ramziy yakuni hamda bitiruvchilarga o‘z sohalari bo‘yicha katta hayot sari dadil qadam bo‘ldi. "Bu kunni hech qachon unutmaymiz" dedilar bitiruvchi-talabalar – kelajak yetakchilari! Bitiruv oqshomi – magistr va bakalavrlar hamda Nordik uchun bu tarixiy quvonchli lahzalar yorqin suratlar hamda qalblarga muhrlandi. Diplom topshirish marosimi ilm, mehnat va orzular uyg‘unlashgan bayram sifatida tantanali nishonlandi.
Nordik universitetida ijodiy imtihonlar!
Respublikamizning turli hududlaridan kelgan abituriyentlar ijodiy imtihonda qalam kuchi, o‘z fikrlarini erkin bayon etish mahorati bo‘yicha sinovdan o‘tdilar.
Musiqa taʼlimi yo‘nalishiga talabgorlar esa yozma, og‘zaki, cholg‘u va xonandalik ijrochiligidan qobiliyatlarini namoyish etishdi.
Imtihon sohalar yetakchilaridan iborat hakamlar hayʼati kuzatuvida shaffof o‘tkazilib, xolis baholandi.
📌 Nordikda hujjatlar qabuli davom etmoqda.
📞 Batafsil maʼlumot: +998555084400
PhD darajasiga yo‘l: Nordik seminarida dissertatsiyalar muhokamasi
Seminar majlisida universitet mustaqil izlanuvchisi Jasurbek Turg‘unovning 08.00.03 – “Sanoat iqtisodiyoti” ixtisosligida iqtisodiyot fanlari bo‘yicha falsafa doktori (PhD) ilmiy darajasi olish uchun tayyorlagan dissertatsiya ishi muhokama qilindi.
“Sanoat korxonalari rivojlanishining atrof-muhitga ta’sirini baholash mexanizmini takomillashtirish” mavzusidagi tadqiqotda ishlab chiqilgan ilmiy takliflar asoslangan va dolzarb ekani ta’kidlandi.
Shuningdek, Toshkent davlat iqtisodiyot universiteti tadqiqotchisi Aziza Mirzaraximovaning 08.00.16 – “Raqamli iqtisodiyot va xalqaro raqamli integratsiya” ixtisosligidagi “Elektron sog‘liqni saqlash” tizimini takomillashtirishda yangi texnologik yondashuvlar tadqiqoti" mavzusida tayyorlagan dissertatsiyasi amaliy asoslanganligi eʼtirof etildi.
Seminar davomida Samarqand davlat arxitektura-qurilish universiteti tayanch doktoranti Mahliyo Diyarovaning 08.00.13 – “Menejment” va 08.00.07 – “Moliya, pul muomalasi va kredit” tutash ixtisosligidagi “Qurilish korxonalarida boshqaruv mexanizmlarini takomillashtirish” mavzusidagi dissertatsiya ishi keng muhokama qilinib, zarur ilmiy-amaliy tavsiyalar berildi.
Mazkur seminar innovatsion fikrlar va ilmiy asoslangan yondashuvlarni ilgari surish, shuningdek, iqtisodiyotning turli tarmoqlarida zamonaviy tadqiqotlar olib borayotgan izlanuvchilarga mustahkam nazariy-amaliy tayanch yaratish yo‘lida muhim ahamiyat kasb etdi.
Umarov Elshod G‘ulomovichning falsafa doktori (PhD) dissertatsiyasi himoyasi to‘g‘risida
Falsafa doktori (PhD) ilmiy darajasini olish uchun tayyorlangan dissertatsiya ishi himoyasi Xalqaro Nordik universiteti huzuridagi ilmiy darajalar beruvchi PhD.03/29.12.2022.I.157.01 raqamli Ilmiy kengashning 2025-yil 15-iyul kuni soat 10:00 dagi majlisida bo‘lib o‘tadi.
Manzil: 100043, Toshkent shahri, Sebzor ko‘chasi, 22A uyda joylashgan Xalqaro Nordik universiteti "Xadra" o‘quv binosi.
Tel.: +99895 505-44-00
e-mail: info@nordicuniversity.org