Yangiliklar
O‘zbekiston–Shvetsiya ta’lim muloqoti: global stipendiya dasturi doirasida yangi imkoniyatlar
December 24 , 2025
522
O‘zbekiston Respublikasining Shvetsiya Qirolligidagi elchixonasi tashabbusi bilan Shvetsiya Instituti tashkiloti hamkorligida Global Professionals Scholarship (GPS) dasturiga bag‘ishlangan onlayn muloqot tashkil etildi.
Ushbu uchrashuv O‘zbekiston yoshlarini Yevropaning nufuzli ta’lim va kasbiy rivojlanish imkoniyatlari bilan bog‘lash yo‘lidagi navbatdagi muhim tashabbus bo‘ldi.
Muloqotda elchixona vakillari bilan bir qatorda O‘zbekiston Respublikasi Oliy ta’lim, fan va innovatsiyalar vazirligi, "El-yurt umidi" jamg‘armasi, Xalqaro Nordik universiteti hamda Jahon iqtisodiyoti va diplomatiya universiteti vakillari ishtirok etdilar.
Elchixona sa’y-harakatlari natijasida O‘zbekiston 34 ta davlat qamrab olingan GPS dasturi ro‘yxatiga kiritildi. Bu dastur, ayniqsa, bakalavriat bosqichini tamomlayotgan iqtidorli yoshlar uchun Shvetsiyada tahsil olish va professional tajriba orttirish yo‘lida yuksak imkoniyatlar eshigini ochadi.
Muloqot davomida XNU rahbariyati tomonidan universitet faoliyati va xalqaro yo‘nalishlari bo‘yicha taqdimot o‘tkazildi. Shuningdek, hamkorlikni yanada kengaytirish maqsadida Xalqaro Nordik universitetida fin tilidan tashqari shved tilini o‘rgatish kurslarini boshlash taklif etildi. Bu ta’limiy integratsiyani mustahkamlash va madaniy yaqinlashuvni kuchaytirishga xizmat qilishi bilan ahamiyatlidir.
Muhokamalar yakunida Xalqaro Nordik universiteti O‘zbekiston va Shimoliy Yevropa davlatlari o‘rtasidagi akademik, ilmiy va madaniy aloqalarni rivojlantirishda “intensiv hub” sifatida muhim rol o‘ynayotgani e’tirof etildi.
So'nggi yangiliklar
Sohibqiron merosi — yoshlar tafakkurida
Davra suhbatida temurshunos olim, tarix fanlari nomzodi, professor Akbar Zamonov talabalarga Sohibqiron shaxsiyati, uning davlat boshqaruvidagi noyob tajribasi va tarixiy merosining bugungi kun uchun ahamiyati jihatlari haqida chuqur va tahliliy fikrlarini yetkazdi.
Tadbirning asosiy maqsadi — yoshlar qalbida tarixiy xotira va milliy iftixor tuyg‘usini mustahkamlash, Amir Temur siymosi orqali strategik tafakkur, yetakchilik va mas’uliyat kabi fazilatlarni shakllantirishdir.
Uchrashuv davomida mavzuga oid tahliliy ma’ruza tinglandi. Talabalar bilan savol-javoblar va ochiq muloqot o‘tkazildi.
Uchrashuvda yoshlarning nafaqat tarixiy bilimlari boyitildi, balki mustaqil fikrlashga ham undaldi.
Davra suhbatida universitetning Tarix va Jurnalistika yo‘nalishi talabalari faol ishtirok etdilar.
Xalqaro muloqot: tahlil va taʼlim integratsiyasi
Nufuzli mehmon — Jurnalistika va Taʼlim boshqaruvi bo‘yicha katta tajribaga ega xalqaro ekspert bilan fikrlar almashildi. Xususan, taʼlim tendensiyalari, zamonaviy boshqaruv yondashuvlari, akademik rivojlanishning yangi modellarini tahlil qilish va kelgusidagi hamkorlik yo‘nalishlarini belgilab olishga qaratilgan mazmunli muloqot o‘tkazildi.
Uchrashuv davomida qo‘shma loyihalarni yo‘lga qo‘yish, hamkorlikda xalqaro konferensiyalar tashkil etish, barqaror rivojlanish yechimlarini ishlab chiqish, tahlillarga asoslangan amaliy yo‘riqnomalar — bilimlar almashinuvi, talabalar va tadqiqotchilar uchun yangi akademik platformalar yaratish xususida so‘z bordi.
Xalqaro darajadagi ilmiy va tahliliy platformalarni kengaytirish borasida kelishuvlarga erishdi.
ETS bilan hamkorlik: xalqaro sertifikatsiya va akademik mobillik sari
Educational Testing Service (ETS)ning Yevroosiyo va Markaziy Osiyo bo‘yicha mintaqaviy direktori Anna Gutkowska-Zając boshchiligidagi delegatsiya tashrif buyurdi.
Uchrashuv davomida taʼlim sifatini yuksaltirishga xizmat qiluvchi muhim yo‘nalishlar muhokama qilindi. Jumladan, o‘qituvchilar malakasini oshirish, ETS tomonidan tasdiqlangan zamonaviy kontentlar asosida qo‘shma treninglar, seminarlar va vebinarlar tashkil etish, ingliz tilini o‘qitish bo‘yicha ilg‘or metodikalar joriy etish masalalari alohida eʼtibor markazida bo‘ldi.
Shuningdek, TOEFL iBT imtihoniga tayyorgarlik ko‘rish, talabalar va pedagoglar o‘rtasida test savodxonligini rivojlantirish, xalqaro sertifikatsiyaga tizimli yondashuvni shakllantirish hamda global akademik mobillik uchun mustahkam poydevor yaratish istiqbollari atroflicha ko‘rib chiqildi.
Mazkur tashrif davomida tomonlar o‘rtasida o‘zaro anglashuv memorandumi imzolandi. Ushbu hujjatda ta’lim sifatini oshirish, innovatsion yondashuvlarni keng joriy etish va xalqaro integratsiyani kengaytirishga qaratilgan aniq ustuvor yo‘nalishlar belgilab olindi.
Bu hamkorlik Nordik universiteti va ETS o‘rtasidagi hamkorlikni uzoq muddatga mustahkamga xizmat qiladi.
Nuqtai nazar: Mamlakat nufuzini namoyon qiladigan katta kuch
“Xalq so‘zi” gazetasida Xalqaro Nordik universiteti rektori Sherzod Mustafakulov muallifligida e’lon qilingan maqolada mazkur yig‘ilishda alohida urg‘ulangan muhim nuqtalar tahlil etilgan, samarali tizim uchun qator yondashuv va takliflar ilgari surilgan.
Maqolada qayd etilganidek, uzluksiz vertikal integratsiya — "maktab — federatsiya — universitet" modeli orqali iqtidorli yoshlar uzluksiz rivojlanadi, har bir sportchi uchun individual rivojlanish dasturlari muhim.
Shuningdek, sport iqtisodiyotini rivojlantirish, klublar va akademiyalar tuzish, raqamli shaffoflik, ilm-fan va sport integratsiyasini kuchaytirish masalalariga eʼtibot qaratilgan.
Sport milliy taraqqiyot strategiyasining eng muhim ustuniga aylanishi lozim. Mazkur masalalarni chuqurroq anglash uchun maqolada ommaviy sportni rivojlantirish borasida ilg‘or davlatlar tajribalari tahlil etilgan.
Yanada kengroq tahlil va fikrlar bilan "Xalq so‘zi"ning 10-aprel soni sahifalarida tanishish mumkin.