Yangiliklar
“O‘zbekiston–2030 strategiyasi: amalga oshirilayotgan islohotlar tahlili, muammolar va yechimlar”
November 19 , 2025
454
Xalqaro Nordik universitetida ushbu mavzuda mamlakat taraqqiyotining asosiy yo‘nalishlarini qamrab olgan respublika ilmiy-amaliy konferensiyasi o‘tkazildi.
Mazkur anjumanda davlat boshqaruvi, iqtisodiyot, ekologiya, tashqi siyosat, raqamli transformatsiya, turizm va jamiyat rivoji kabi ustuvor sohalardagi islohotlarni ilmiy jamoatchilik ishtirokida tahlil qilish, ularning amaliy natijalarini muhokama etish hamda istiqboldagi vazifalarni belgilashga asosiy e’tibor qaratildi.
Konferensiya ochilishida Nordik universiteti rektori, iqtisodiyot fanlari doktori, professor Sherzod Mustafakulov O‘zbekiston–2030 strategiyasini mamlakatning yangi avlodi uchun mo‘ljallangan kompleks modernizatsiya dasturi sifatida baholab, uni amalga oshirishda ilmiy hamjamiyatning o‘rni tobora ortib borayotganini e’tirof etib o‘tdi. Innovasion yondashuvlar, ilmiy tahlillar va dalillarga asoslangan qarorlar qabul qilish strategiya samaradorligini belgilovchi asosiy omillar ekanini ta’kidladi.
Shuningdek, anjumanda Oliy Majlis Qonunchilik palatasi deputati, Demokratik institutlar va fuqarolik jamiyatini rivojlantirish masalalari qo‘mitasi a’zosi Navruzbek Yusupov va “O‘zbekiston temir yo‘llari” AJ moliya departamenti boshlig‘i (PhD) Jasurbek Qodirov o‘z ma’ruzalarini taqdim etdilar. Qonunchilik islohotlari, fuqarolik jamiyati institutlarini mustahkamlash va strategik vazifalarni qonuniy asosda qo‘llab-quvvatlash, atrof-muhit muhofazasi va hisob siyosatini takomillashtirish masalalaridagi ilmiy mulohazalari bilan o‘rtoqlashdilar.
Konferensiyada turli sohalar yetakchi ekspertlari O‘zbekiston–2030 strategiyasida belgilangan vazifalar bo‘yicha chuqur tahliliy ma’ruzalar taqdim etdilar. Xususan, ekologik barqarorlik va yashil taraqqiyot – atrof-muhitni muhofaza qilish, resurslardan oqilona foydalanish va ekologik xavfsizlik bo‘yicha strategiyaning ustuvor yo‘nalishlari yoritildi. Davlat-xususiy sherikchiligining yangi modeli bo‘yicha amaliy takliflar taqdim qilindi. Oziq-ovqat xavfsizligi, xalqaro standartlarga mos, barqaror ishlab chiqarish va ta’minot tizimini shakllantirish bo‘yicha ilmiy xulosalar berildi.
Shuningdek, tashqi siyosat samaradorligi mintaqaviy hamkorlik, investitsion diplomatiya va global maydondagi faol tashqi siyosat natijalari keng muhokama qilindi. Yashil iqtisodiyotga o‘tish, iqtisodiy o‘sishning ekologik xavfsiz modelini shakllantirish bo‘yicha dolzarb ilmiy tahlillar taqdim etildi. Ma’ruzachilar davlat boshqaruvini raqamlashtirishda kosmik ma’lumotlarning qo‘llanilishi va uning istiqbollari xususida ham ilmiy izlanishlari samaralari bilan bo‘lishdilar.
Konferensiyaning shoʻba yig‘ilishlari qizg‘in davom etdi. Iqtisodiy barqarorlik va ijtimoiy-huquqiy o‘zgarishlar, milliy iqtisodiyotni modernizatsiya qilish va xalqaro integratsiya, yoshlar siyosati, ma’naviyat va madaniy meros, ekologik barqaror taraqqiyot, raqamli transformatsiya va ilg‘or boshqaruv tizimlari yo‘nalishlarida ilmiy ma’ruzalar tinglandi. Islohotlarning jamiyatga ta’siri, mavjud muammolar, ularning sabablari hamda innovatsion yechimlar yuzasidan fikr almashildi. Tadqiqotchilar va amaliyotchi mutaxassislar tomonidan bir qator amaliy takliflar ilgari surildi.
Tadbir yakunida sho‘ba yig‘ilishlarining asosiy xulosalari umumlashtirildi va O‘zbekiston–2030 strategiyasini ilmiy asosda qo‘llab-quvvatlash bo‘yicha kelgusi rejalar, vazifalar belgilab olindi.
Konferensiyaga jami 130 dan ortiq tezis va maqolalar kelib tushdi. 16 ta eng sara maqola Nordik elektron jurnalining maxsus soniga qabul qilindi, 100 ga yaqin maqola va tezis esa ASR platformasi va konferensiya to‘plamida chop etildi.
So'nggi yangiliklar
Sohibqiron merosi — yoshlar tafakkurida
Davra suhbatida temurshunos olim, tarix fanlari nomzodi, professor Akbar Zamonov talabalarga Sohibqiron shaxsiyati, uning davlat boshqaruvidagi noyob tajribasi va tarixiy merosining bugungi kun uchun ahamiyati jihatlari haqida chuqur va tahliliy fikrlarini yetkazdi.
Tadbirning asosiy maqsadi — yoshlar qalbida tarixiy xotira va milliy iftixor tuyg‘usini mustahkamlash, Amir Temur siymosi orqali strategik tafakkur, yetakchilik va mas’uliyat kabi fazilatlarni shakllantirishdir.
Uchrashuv davomida mavzuga oid tahliliy ma’ruza tinglandi. Talabalar bilan savol-javoblar va ochiq muloqot o‘tkazildi.
Uchrashuvda yoshlarning nafaqat tarixiy bilimlari boyitildi, balki mustaqil fikrlashga ham undaldi.
Davra suhbatida universitetning Tarix va Jurnalistika yo‘nalishi talabalari faol ishtirok etdilar.
Xalqaro muloqot: tahlil va taʼlim integratsiyasi
Nufuzli mehmon — Jurnalistika va Taʼlim boshqaruvi bo‘yicha katta tajribaga ega xalqaro ekspert bilan fikrlar almashildi. Xususan, taʼlim tendensiyalari, zamonaviy boshqaruv yondashuvlari, akademik rivojlanishning yangi modellarini tahlil qilish va kelgusidagi hamkorlik yo‘nalishlarini belgilab olishga qaratilgan mazmunli muloqot o‘tkazildi.
Uchrashuv davomida qo‘shma loyihalarni yo‘lga qo‘yish, hamkorlikda xalqaro konferensiyalar tashkil etish, barqaror rivojlanish yechimlarini ishlab chiqish, tahlillarga asoslangan amaliy yo‘riqnomalar — bilimlar almashinuvi, talabalar va tadqiqotchilar uchun yangi akademik platformalar yaratish xususida so‘z bordi.
Xalqaro darajadagi ilmiy va tahliliy platformalarni kengaytirish borasida kelishuvlarga erishdi.
ETS bilan hamkorlik: xalqaro sertifikatsiya va akademik mobillik sari
Educational Testing Service (ETS)ning Yevroosiyo va Markaziy Osiyo bo‘yicha mintaqaviy direktori Anna Gutkowska-Zając boshchiligidagi delegatsiya tashrif buyurdi.
Uchrashuv davomida taʼlim sifatini yuksaltirishga xizmat qiluvchi muhim yo‘nalishlar muhokama qilindi. Jumladan, o‘qituvchilar malakasini oshirish, ETS tomonidan tasdiqlangan zamonaviy kontentlar asosida qo‘shma treninglar, seminarlar va vebinarlar tashkil etish, ingliz tilini o‘qitish bo‘yicha ilg‘or metodikalar joriy etish masalalari alohida eʼtibor markazida bo‘ldi.
Shuningdek, TOEFL iBT imtihoniga tayyorgarlik ko‘rish, talabalar va pedagoglar o‘rtasida test savodxonligini rivojlantirish, xalqaro sertifikatsiyaga tizimli yondashuvni shakllantirish hamda global akademik mobillik uchun mustahkam poydevor yaratish istiqbollari atroflicha ko‘rib chiqildi.
Mazkur tashrif davomida tomonlar o‘rtasida o‘zaro anglashuv memorandumi imzolandi. Ushbu hujjatda ta’lim sifatini oshirish, innovatsion yondashuvlarni keng joriy etish va xalqaro integratsiyani kengaytirishga qaratilgan aniq ustuvor yo‘nalishlar belgilab olindi.
Bu hamkorlik Nordik universiteti va ETS o‘rtasidagi hamkorlikni uzoq muddatga mustahkamga xizmat qiladi.
Nuqtai nazar: Mamlakat nufuzini namoyon qiladigan katta kuch
“Xalq so‘zi” gazetasida Xalqaro Nordik universiteti rektori Sherzod Mustafakulov muallifligida e’lon qilingan maqolada mazkur yig‘ilishda alohida urg‘ulangan muhim nuqtalar tahlil etilgan, samarali tizim uchun qator yondashuv va takliflar ilgari surilgan.
Maqolada qayd etilganidek, uzluksiz vertikal integratsiya — "maktab — federatsiya — universitet" modeli orqali iqtidorli yoshlar uzluksiz rivojlanadi, har bir sportchi uchun individual rivojlanish dasturlari muhim.
Shuningdek, sport iqtisodiyotini rivojlantirish, klublar va akademiyalar tuzish, raqamli shaffoflik, ilm-fan va sport integratsiyasini kuchaytirish masalalariga eʼtibot qaratilgan.
Sport milliy taraqqiyot strategiyasining eng muhim ustuniga aylanishi lozim. Mazkur masalalarni chuqurroq anglash uchun maqolada ommaviy sportni rivojlantirish borasida ilg‘or davlatlar tajribalari tahlil etilgan.
Yanada kengroq tahlil va fikrlar bilan "Xalq so‘zi"ning 10-aprel soni sahifalarida tanishish mumkin.