Ta’lim, ma’rifat va innovatsiyalar yo‘lida muhim hamkorlik
May 06 , 2026
406
Xalqaro Nordik universiteti va “Ziyoli avlod" madaniyat va ma’rifat markazi rahbariyatlari o‘rtasida uchrashuv bo‘lib o‘tdi.
Muloqot davomida yoshlarning ilmiy, ijodiy va ma’naviy salohiyatini qo‘llab-quvvatlash, iqtidorli talabalarni rag‘batlantirish hamda innovatsion tashabbuslarni rivojlantirish masalalarida so‘z bordi.
Ilmiy-amaliy konferensiyalar, forum va festivallar tashkil etish, yoshlarning madaniyat va san’atga qiziqishini oshirish,
kreativ va innovatsion loyihalarni rivojlantirish kabi ustuvor yo‘nalishlarda hamkorlikning ahamiyati taʼkidlandi.
Shuningdek, “Innovation Scholar” ilmiy jurnalining salohiyatini universitetning boy ilmiy-tadqiqot resurslari va professor-o‘qituvchilarning ilmiy maqolalari bilan boyitish, faol xodimlar va talaba-yoshlarni "Ziyoli avlod — millat iftixori" esdalik nishoni bilan taqdirlash, ma’naviy-ma’rifiy loyihalar orqali yoshlarning ilmiy va ijodiy salohiyatini keng namoyon etishga kelishildi.
Shuningdek, o‘zaro anglashuv memorandumi imzolanib, bilim, ma’rifat va kreativ tafakkur uyg‘unlashgan yangi imkoniyatlarga yo‘l ochildi.
So'nggi yangiliklar
"Kompyuter sporti" turniri: IT bilim va jamoaviylik sinovi
Musobaqada 6 ta jamoa chempionlik uchun kurash olib bordi.
3 ta shart asosida o‘tgan bellashuv davomida ishtirokchilar tezkorlik va texnik mahoratini, kuchli taktika hamda jamoaviy birdamliklarini ham namoyish etdilar.
Yakuniy natijalarga ko‘ra o‘rinlar quyidagicha taqsimlandi:
🥇 1-o‘rin — “MIDDLES” jamoasi — Jahongir Ziyodullayev, Mashhurbek Olimov, Sardor Nurmatov, Miraziz Muxtorov va Og‘abek Samadov.
🥈 2-o‘rin — “NEXUS” jamoasi — Shukurullo Amanturdiyev, Ozodbek Axmedov, Muhriddin Shaxriddinov va JamshidbekTolibov.
🥉 3-o‘rin — “Cyberkent” jamoasi — Boburxon O‘rinxo‘jayev, Jahongir Sindorov, Abdulvosid Abdimalikov, Fayzulloh Umatov va Behruz Xasanov.
👏 G‘olib va sovrindorlarni samimiy muborakbod etamiz!
Musobaqa yoshlarning IT va kompyuter sportiga bo‘lgan qiziqishi va jamoada ishlash ko‘nikmalarini yanada oshirdi.
Inson ruhiyatini anglash san’ati: Nordikda mahorat darsi o‘tkazildi
Dars psixologiya fanlari doktori (DSc), professor Abdumo‘min Rasulov tomonidan olib borildi.
Mashg‘ulot davomida talabalar psixodiagnostik tekshiruvning nazariy asoslari, diagnostik test va so‘rovnomalardan foydalanish, kuzatuv usullari, natijalarni tahlil va interpretatsiya qilish, amaliy misollar asosida tadqiqot olib borish bo‘yicha muhim bilim hamda ko‘nikmalarga ega bo‘ldilar.
Ayniqsa, nazariya va amaliyot uyg‘unligida tashkil etilgan ushbu mahorat darsi Psixologiya yo‘nalishi talabalari uchun tajriba maktabi vazifasini o‘tadi.
“Fidoyilar” xotira kechasi: buyuk ma’rifatparvarlar xotirasi eʼzozlandi
Avlodlar uchrashuvida milliy tafakkur, tarixiy xotira va ma’rifatga hurmatni mustahkamlashga ahamiyat qaratildi.
Mazkur kechada o‘z umrini xalq ma’rifati, ilm-fan va pedagogika rivojiga bag‘ishlagan buyuk ma’rifatparvarlar hayoti hamda faoliyati yodga olindi. Ularning jasorati, ilm yo‘lidagi fidoyiligi va millat kelajagi uchun qilgan xizmatlari bugungi yosh avlod uchun chinakam ibrat maktabi bo‘lib xizmat qilayotgani eʼtirof etildi.
Bugun taraqqiyot haqida gap ketganda, avvalo, ma’rifat va tarbiya masalasi dolzarb ahamiyat kasb etmoqda. Aynan ana shunday fidoyi insonlarning boy merosini anglash va qadrlash esa yoshlarning Vatanga muhabbatini, ilmga hurmatini va ma’naviy mas’uliyatini yanada kuchaytiradi.
Xotira kechasi talabalarning mavzuga doir chiqishlari, mehmon maʼruzachilarning ibratli nutqlari bilan mazmunli kechdi.
Nordikda zamonaviy pedagogikaning yangi sahifalari
Bu yangi kitoblar bugungi ta’lim ehtiyojlariga javob beradigan muhim ilmiy va metodik manbalardir.
📘 Nashr etilgan qo‘llanmalar:
➖ “Информационно-коммуникационные технологии” (mualliflar — D. Sabirova, O. Azizov)
➖ “Oila pedagogikasi” (muallif — F. Islamova)
➖ “Maktabgacha ta’limda etnopedagogika” (muallif — M. Xasanova)
➖ “Milliy qadriyatlar asosida 5–6 yoshli bolalarda axloqiy sifatlarni shakllantirish metodikasi” (muallif — D. Mahmudova).
Mazkur qo‘llanmalarda zamonaviy pedagogik yondashuvlar, milliy qadriyatlar va tarbiya uyg‘unligi, raqamli texnologiyalarni ta’limga tatbiq etish, maktabgacha ta’limning innovatsion metodikalari hamda nazariya va amaliyotni bog‘lovchi metodik tavsiyalar keng yoritilgan.
Ushbu adabiyotlar O‘zbekiston Respublikasi Oliy ta’lim, fan va innovatsiyalar vazirligi tavsiyasi asosida nashr etilgani bilan ham alohida ahamiyatga ega.
Bu nashrlar talabalar uchun puxta bilim manbai, pedagoglar uchun metodik tayanch, ilmiy izlanuvchilar uchun esa zamonaviy ilmiy yo‘nalishlar bo‘yicha muhim resurs vazifasini bajaradi.