Yangiliklar
Nordik va DAAD: Germaniya universitetlari bilan yangi istiqbollar
March 12 , 2026
138
Nordik universitetida Germaniyaning nufuzli akademik almashinuv tashkiloti — DAAD vakillari bilan muhim uchrashuv bo‘lib o‘tdi.
Uchrashuvda DAADning Markaziy Osiyo bo‘yicha mintaqaviy rahbari Gisella Zimmermann va akademik hamkorlik bo‘yicha mutaxassis Kanybek Sydykbekov bilan muzokara o‘tkazildi.
Muloqot davomida Germaniya universitetlari bilan hamkorlikni kengaytirish, ochilishi rejalashtirilayotgan yangi taʼlim yo‘nalishlari bo‘yicha ustuvor maqsad va vazifalar, talabalar uchun DAAD stipendiya dasturlari imkoniyatlari muhokama qilindi.
Shuningdek, nemis tilini chuqur o‘rganishni rag‘batlantirish va OnSET xalqaro til imtihonida qatnashish imkoniyatlarini kengaytirish, professor-o‘qituvchilarning Germaniyada malaka oshirish istiqbollari yuzasidan fikr almashildi.
Ushbu uchrashuv ikki tomonlama akademik hamkorlikni mustahkamlash, taʼlim va ilmiy tadqiqotlar sohasida yangi imkoniyatlar yaratish, xalqaro ta’lim, grantlar va akademik almashinuv yo‘lida yana bir muhim qadam bo‘ldi.
So'nggi yangiliklar
“Miss Nordic – 2026”: Nordik toji o‘z egasini topdi!
Talaba-qizlarimiz nafaqat go‘zalligi, balki bilimi, nutqi va ijodiy yondashuvi bilan ham o‘ziga xosliklarini namoyish etishdi.
Tanlovda dastlab insho yozish – fikr va tafakkur sinovi o‘tkazildi. Tanishtiruv shartida ishtirokchilarning o‘zini erkin tutishi va jozibador namoyon etishiga ahamiyat qaratildi.
Milliy obraz yaratish shartida esa milliy qadriyatlar keng tarannum etildi. Erkin mavzu bahsida ijod va sahna mahorati sinovdan o‘tkazildi.
👑 Bi yilgi Miss Nordic toji 1-o‘rin sohibasi Xusniyabonu Maxmudovaga nasib etdi!
2-o‘ringa Marjona Maxmudova, 3-o‘ringa Muborak G‘ayratova sazovor bo‘ldilar.
🌟 Tanlovda faol ishtirok etgan talabalar nomlarini ham alohida e’tirof etib o‘tamiz:
💫 Nasibaxon Mirsodiqova
💫 Mohinur Mirobidova
💫 Shahzoda Ergasheva.
💐 “Miss Nordic – 2026” yana bir bor shuni isbotladi: Nordik qizlari — nafislik, bilim va iste’dod uyg‘unligining yorqin timsolidirlar!
📸 Tanlovning eng yorqin lahzalari — fotosuratlarda.
Amaliyot — kasb o‘rgatuvchi maktab bo‘lmoqda
Talabalar U.Q.Qurbonov nomidagi respublika bolalar ruhiy-asab kasalxonasida amaliyotda bo‘ldilar.
Mashg‘ulotda ular rivojlanishida nuqsoni bo‘lgan bolalar bilan ishlash jarayonini kuzatdilar. Logopedik reabilitatsiya usullari bilan yaqindan tanishdilar.
Shuningdek, tashxis qo‘yish va kompleks korreksion yordam jarayonlari bo‘yicha mutaxassislar tavsiyalarini tingladilar.
Eng muhimi, talabalar nazariy bilimlarini haqiqiy amaliy jarayon bilan bog‘lash imkoniga ega bo‘lishdi. Uzoq muddat davolanayotgan bolalar uchun tashkil etilgan kasalxonada inklyuziv ta’lim tizimi haqida ham batafsil ma’lumotlar olishdi.
Bu tajriba kelajak logopedlarini insoniylik, sabr va mehr bilan ishlashga o‘rgatuvchi maktab ham bo‘ldi.
Talabalar va tadqiqotchilar uchun muhim manbalar: uch yangi kitob
Mazkur darslikda milliy identivlikning nazariy asoslari hamda uning ommaviy axborot vositalarida namoyon bo‘lishi chuqur tahlil qilinadi.
Kitob jurnalistika yo‘nalishi talabalari, tadqiqotchilar va media sohasida faoliyat yuritayotgan mutaxassislar uchun nazariya va amaliyotni uyg‘unlashtirgan muhim qo‘llanmadir. Ushbu asar milliy identivlikni anglash va uni media makonida ifodalash masalalariga yangi ilmiy qarashlar olib kiradi.
Muallif — Yulduz Artikova.
“Xalqaro iqtisodiyot” — global iqtisodiy jarayonlarni tushunishga yo‘l ochuvchi qo‘llanma.
Ushbu o‘quv qo‘llanmada zamonaviy dunyo iqtisodiyotining nazariy asoslari va amaliy jarayonlari tizimli yoritilgan. Unda xalqaro savdo nazariyalari, investitsiyalar, global iqtisodiy integratsiya, tashqi savdo siyosati hamda xalqaro moliyaviy munosabatlar kabi muhim masalalar batafsil tahlil qilingan.
Kitob iqtisodiyot yo‘nalishida tahsil olayotgan talabalar uchun muhim akademik manba bo‘lib, global iqtisodiy jarayonlarni chuqur tushunishga yordam beradi.
Muallif — A.Nigmanov.
“Maktabgacha pedagogika” — bolalar rivojining ilmiy asoslariga bag‘ishlangan.
Mazkur o‘quv qo‘llanmada maktabgacha yoshdagi bolalarning psixologik, biologik va ijtimoiy rivojlanish qonuniyatlari hamda ta’lim-tarbiya jarayonining pedagogik asoslari yoritilgan.
Kitob maktabgacha ta’lim yo‘nalishi talabalari, pedagoglar va ilmiy izlanish olib borayotgan tadqiqotchilar uchun nazariy bilim va amaliy tajribani uyg‘unlashtiruvchi muhim manba hisoblanadi.
Muallif — M.Egamberdiyeva
Tabassum, gullar va samimiy ehtirom: Nordikda 8-mart tantanasi
Nordik xotin-qizlari erkaklar tomonidan bayramona kayfiyatda gullar, samimiy tilaklar va iliq eʼtibor bilan tantanali kutib olindilar. Ular uchun maxsus tayyorlangan yo‘lakdan tabriklar, tilaklar qurshovida o‘tish jarayoni chinakam bayram ruhini yaratdi — har bir qadam tabriklar, gul ifori va quvonchli tabassumlar bilan bezandi.
Yo‘lak to‘rida esa ayollarni bayramona fotozona qarshi oldi. Bu yerda ular hayajon, quvonch va samimiy kulgular bilan o‘z ismlari bitilgan doska oldida esdalik suratlariga tushdilar.
Bayram dasturi yanada rang-barang va mazmunli kechdi. Tadbir mehmoni sifatida taniqli xonanda, hajviy ko‘rsatuvlar muallifi va shoumen Zokir Ochildiyev davraga o‘zgacha kayfiyat olib kirdi. Uning quvnoq chiqishlari, latifalari va sahna hazillari zalni kulguga to‘ldirib, tadbirga jo‘shqin va samimiy muhit bag‘ishladi.
Shuningdek, mehmon sanʼatkorlarning ijrolari, kuy-qo‘shiqlari davraga yanada yuqori kayfiyat va bayram shukuhi olib kirdi.
Tadbir davomida universitet rektori hamda jamoa erkak ustozlari ayollarga bo‘lgan hurmat va ehtiromlarini nutqlar, samimiy tabriklar, dilbar sheʼrlar, maxsus tayyorlangan premyera qo‘shiq va videoklip orqali izhor etdilar. Bayram yakunida esa ayollarga esdalik sovg‘alari topshirildi.
Bu kun Nordik xotin-qizlari uchun alohida ehtirom va qadrlash ramziga aylangan. Bayram davomida ular doimgidan ham yuksak hurmat, mehr, quvonch va xushnudlik og‘ushida bo‘ldilar. Zal esa kulgi, qarsaklar va shodon kayfiyatga to‘lib, davra fayzi yanada ortib bordi.
Shu tariqa Nordikda yana bir yorqin, samimiy va esda qolarli kun tarix sahifasiga muhrlandi.
Tabassumlar, quvonchlar va baxtiyor lahzalar bilan to‘la bu go‘zal damlar esa esdalik suratlariga ham muhrlandi.