Yangiliklar
Ilmiy kengash majlisi: navbatdagi dissertatsiya himoyalari o‘tkazildi
March 26 , 2026
1132
Xalqaro Nordik universiteti huzuridagi ilmiy darajalar beruvchi DSc.03/2025.27.12.I.26.01 raqamli Ilmiy kengash majlisi doirasida navbatdagi dissertatsiya ishlari himoya qilindi.
Mazkur ilmiy yig‘ilishda oliy ta’lim va ilm-fan integratsiyasini mustahkamlash, ilmiy tadqiqotlar samaradorligini oshirishga eʼtibor qaratildi.
Majlis davomida tadqiqotchi Nigmanov Azizbek Ulugbekovich tomonidan “O‘zbekiston sanoat tarmoqlarida energiya sarfini kamaytirish bo‘yicha xorijiy tajriba (Xitoy Xalq Respublikasi misolida)” mavzusidagi dissertatsiya ishi taqdim etildi.
Tadqiqotda sanoat korxonalarida energiya samaradorligini oshirishga qaratilgan ilg‘or xorijiy yondashuvlar tahlil qilinib, ularni milliy sharoitga moslashtirish bo‘yicha ilmiy asoslangan taklif va tavsiyalar ilgari surildi.
Himoya jarayonida ishning nazariy va amaliy ahamiyati keng muhokama qilindi.
Shuningdek, tadqiqotchi Xalmatov Turg‘unbay Qo‘chkarovichning “Yengil sanoat korxonalari faoliyatida raqamli texnologiyalardan foydalanishning uslubiy jihatlarini takomillashtirish” mavzusidagi dissertatsiyasi ham kengash raisi va a’zolari tomonidan atroflicha ko‘rib chiqildi.
Mazkur ish raqamli transformatsiya jarayonlarining yengil sanoat tarmoqlariga tatbiqi, ishlab chiqarish samaradorligini oshirish va boshqaruv mexanizmlarini takomillashtirish masalalari chuqur tahlil etilganligi bilan ahamiyatlidir.
Muhokamalar yakunida har ikki dissertatsiya ishi ilmiy yangiligi, amaliy ahamiyati va dolzarbligi nuqtai nazaridan ijobiy baholanib, Ilmiy kengash qaroriga muvofiq munosib ravishda tasdiqlandi.
So'nggi yangiliklar
ETS bilan hamkorlik: xalqaro sertifikatsiya va akademik mobillik sari
Educational Testing Service (ETS)ning Yevroosiyo va Markaziy Osiyo bo‘yicha mintaqaviy direktori Anna Gutkowska-Zając boshchiligidagi delegatsiya tashrif buyurdi.
Uchrashuv davomida taʼlim sifatini yuksaltirishga xizmat qiluvchi muhim yo‘nalishlar muhokama qilindi. Jumladan, o‘qituvchilar malakasini oshirish, ETS tomonidan tasdiqlangan zamonaviy kontentlar asosida qo‘shma treninglar, seminarlar va vebinarlar tashkil etish, ingliz tilini o‘qitish bo‘yicha ilg‘or metodikalar joriy etish masalalari alohida eʼtibor markazida bo‘ldi.
Shuningdek, TOEFL iBT imtihoniga tayyorgarlik ko‘rish, talabalar va pedagoglar o‘rtasida test savodxonligini rivojlantirish, xalqaro sertifikatsiyaga tizimli yondashuvni shakllantirish hamda global akademik mobillik uchun mustahkam poydevor yaratish istiqbollari atroflicha ko‘rib chiqildi.
Mazkur tashrif davomida tomonlar o‘rtasida o‘zaro anglashuv memorandumi imzolandi. Ushbu hujjatda ta’lim sifatini oshirish, innovatsion yondashuvlarni keng joriy etish va xalqaro integratsiyani kengaytirishga qaratilgan aniq ustuvor yo‘nalishlar belgilab olindi.
Bu hamkorlik Nordik universiteti va ETS o‘rtasidagi hamkorlikni uzoq muddatga mustahkamga xizmat qiladi.
Nuqtai nazar: Mamlakat nufuzini namoyon qiladigan katta kuch
“Xalq so‘zi” gazetasida Xalqaro Nordik universiteti rektori Sherzod Mustafakulov muallifligida e’lon qilingan maqolada mazkur yig‘ilishda alohida urg‘ulangan muhim nuqtalar tahlil etilgan, samarali tizim uchun qator yondashuv va takliflar ilgari surilgan.
Maqolada qayd etilganidek, uzluksiz vertikal integratsiya — "maktab — federatsiya — universitet" modeli orqali iqtidorli yoshlar uzluksiz rivojlanadi, har bir sportchi uchun individual rivojlanish dasturlari muhim.
Shuningdek, sport iqtisodiyotini rivojlantirish, klublar va akademiyalar tuzish, raqamli shaffoflik, ilm-fan va sport integratsiyasini kuchaytirish masalalariga eʼtibot qaratilgan.
Sport milliy taraqqiyot strategiyasining eng muhim ustuniga aylanishi lozim. Mazkur masalalarni chuqurroq anglash uchun maqolada ommaviy sportni rivojlantirish borasida ilg‘or davlatlar tajribalari tahlil etilgan.
Yanada kengroq tahlil va fikrlar bilan "Xalq so‘zi"ning 10-aprel soni sahifalarida tanishish mumkin.
Sohibqiron ruhi — yoshlar tafakkurida!
Iqtisodiyot va biznesni boshqarish hamda Sanoatni boshqarish va raqamli texnologiyalar kafedralari hamkorligidagi tadbir davomida talaba-yoshlar Sohibqironning bebaho merosi — Temur tuzuklari asosida bilimlarini sinovdan o‘tkazdilar. Jamoalar Temuriylar davlatchiligi falsafasini anglash sari intilishlarini har jihatdan namoyish etishdi.
Bellashuv 2 bosqichda kechdi:
🔹 1-bosqich — tarixiy bilim va mantiq sinovi
🔹 2-bosqich — ijodkorlik maydoni: tuzuklarni rasmlar orqali jonlantirish.
5 ta jamoa o‘rtasida intellektual madaniyat doirasida bahslar qizg‘in kechdi.
Ishtirokchilar bilim, topqirlik, tezkor fikrlash va jamoaviy hamjihatlik namunasini ko‘rsatdilar.
Tadbir yakunida barcha qatnashchilarga sertifikatlar topshirildi, eng kuchli jamoalar esa munosib taqdirlandilar.
1-o‘rin — World economics
2-o‘rin — 1-EK-24
3-o‘rin — Space
4-o‘rin — 5-JI
5-o‘rin — Liderlar.
Sohibqiron merosini o‘rganish yoshlar tafakkuriga kuch va yetakchilik bag‘ishladi.
Deputatlar va yoshlar: g‘oya, tashabbus va imkoniyat
Tadbirkorlar va ishbilarmonlar harakati — O‘zbekiston Liberal-demokratik partiyasi Toshkent shahar Kengashi hamkorligidagi uchrashuvda ochiq va samimiy muloqot muhiti yaratildi.
Unda Oliy Majlis Qonunchilik palatasi deputatlari Gulshana Xudoyarova va Aziza Aminova, shuningdek, O‘zLiDeP Toshkent shahar Kengashi Yoshlar va tadbirkorlikni qo‘llab-quvvatlash bo‘limi mudiri Dilnoza Tajieva o‘z maʼruzalari bilan ishtirok etdilar.
Yoshlar tadbirkorligini rivojlantirish, yangi loyihalarni qo‘llab-quvvatlash mexanizmlari, talabalar tashabbuslarini amaliyotga joriy etish yo‘llari, davlat va yoshlar o‘rtasidagi hamkorlikni mustahkamlash masalalari muhokama markazida bo‘ldi.
Uchrashuvda bugungi yoshlar faqat bilim oluvchi emas, jamiyatdagi o‘zgarishlar tashabbuskori sifatida shakllanishi zarurligi taʼkidlandi.