Mehnat barometri: kasbiy bandlikni baholash O‘zbekistonga qanday naf keltiradi?

Ularning hayot yo‘li fidoyilik, ma’rifat va Vatanga muhabbatning yorqin timsoliga aylanadi. Ana shunday yurt fidoyilaridan biri — O‘zbekistonda xizmat ko‘rsatgan jurnalist, "Mehnat shuhrati" ordeni va "Shuhrat" medali sohibi, Xalqaro Cho‘lpon mukofoti laureati, taniqli adib, publitsist va jamoat arbobi, "Xalq so‘zi" hamda "Народное слово" gazetalari bosh muharriri O‘tkir Rahmatdir.

Xalqaro Nordik universitetida atoqli adibga universitetning "Faxriy professor" ilmiy unvoni topshirilgani uning ko‘p yillik samarali mehnati va milliy jurnalistika hamda ma’naviyat rivoji, yoshlar maʼrifatiga qo‘shgan ulkan hissasiga bildirilgan e’tirof bo‘ldi.

Tadbir doirasida O‘tkir Rahmatning ijodiga bag‘ishlangan kitoblar ko‘rgazmasi tashkil etildi, yangi "Xalq uchun baxshida yurak" kitobi taqdimoti, ijodiy uchrashuv va adabiy muloqot o‘tkazildi.

Anjumanda adibning serqirra ijodi, boy adabiy merosi hamda xalq manfaatlariga baxshida etilgan umr yo‘liga keng nazar tashlandi.

1948-yil 15-mart kuni Samarqand viloyatining Uzun qishlog‘ida tavallud topgan O‘tkir Rahmatning qalbida bolalikdan shakllangan so‘zga muhabbat, Vatanga sadoqat va xalq dardiga hamnafas bo‘lish tuyg‘usi uni zamonaviy o‘zbek jurnalistikasi va adabiyotining yetakchi namoyandalaridan biriga aylantirdi.

Alisher Navoiy nomidagi Samarqand davlat universiteti hamda Toshkent davlat yuridik institutida tahsil olgan ijodkor 1974-yildan matbuot sohasida faoliyatini boshladi. U Prezident Devoni, nufuzli davlat idoralari va mamlakatning yetakchi ommaviy axborot vositalarida mas’ul lavozimlarda samarali mehnat qildi. Mustaqillik yillarida esa uning publitsistikasi Yangi O‘zbekiston taraqqiyotining o‘ziga xos ma’naviy yilnomasiga aylandi. Bosh muharrir sifatida u gazeta sahifalarini nafaqat axborot maydoni, balki xalq bilan davlat o‘rtasidagi ochiq muloqot, fikr va tafakkur minbariga aylantirishga munosib hissa qo‘shdi.

O‘tkir Rahmat ijodi she’riyat, publitsistika va nasrni o‘zida uyg‘unlashtirgan betakror hodisadir. Uning asarlarida inson qadri, Vatanga muhabbat, ma’naviyat, ezgulik va milliy o‘zlik g‘oyalari bosh mavzu sifatida namoyon bo‘ladi. "Irmoq", "Sog‘inch", "Jilg‘a", "Rayhon hidi", "Shukrona", "Oy yog‘dusi", "Ko‘zim qorachug‘i", "Xayol ifori", "Yurakdagi qush", "Dilchiroq", "Mangu ovoz", "Taskin", "O‘tli ruh", "Yillar oralab" kabi o‘nlab kitoblari kitobxonlar qalbidan mustahkam o‘rin egallagan. Bejizga adabiyotshunoslar uni "inson ruhiyatining musavviri" deb ta’riflamaydilar. Chunki u tabiat manzaralari orqali insonni, inson orqali esa jamiyatni teran badiiy talqin etadi.

Anjumanda universitet professor-o‘qituvchilari va mehmonlar ijodkorning xalq ishonchi hamda kitobxonlar mehrini qozonganini alohida ta’kidladilar. Uning sheʼrlaridan namunalar o‘qidilar. Qo‘shiqlarga aylangan satrlarini jonli ijro etdilar.

Tadbir davomida O‘tkir Rahmatning hayoti va ijodiga bag‘ishlangan videofilm namoyish etildi, kitoblar ko‘rgazmasi tashkil qilindi, adabiy muloqot hamda yangi kitob taqdimoti o‘tkazildi.

"Xalq uchun baxshida yurak" — davr va vijdon qissasi. Muallifning yangi kitobi uzoq yillik hayotiy tajribasi, publitsistik kuzatuvlari va fuqarolik pozitsiyasining badiiy ifodasidir. Asarda mamlakatimizda amalga oshirilayotgan islohotlarning mazmun-mohiyati, inson qadrini ulug‘lash, xalq farovonligini ta’minlash, ma’naviy taraqqiyot hamda davlat va jamiyat o‘rtasidagi ishonch masalalari hayotiy misollar va chuqur tahlillar asosida yoritilgan.

Muallif murakkab siyosiy-ijtimoiy jarayonlarni sodda va ravon uslubda talqin etib, o‘quvchini nafaqat voqelik bilan tanishtiradi, balki uni mushohada yuritishga, xulosa chiqarishga va faol fuqarolik pozitsiyasini shakllantirishga chorlaydi. Shu jihatdan mazkur asar badiiy-publitsistik kitob bo‘lish bilan birga, Yangi O‘zbekiston taraqqiyotining ma’naviy ruhini aks ettiruvchi muhim manbalardan biri sifatida ham alohida ahamiyat kasb etadi.

O‘tkir Rahmat bilan bo‘lib o‘tgan uchrashuv nafaqat atoqli ijodkorni sharaflash marosimi, balki xalq manfaatiga xizmat qilgan umr, so‘z mas’uliyati va ma’rifatga sadoqatni ulug‘lovchi yuksak ma’naviy muloqot bo‘ldi.

Tadbir yakunida Universitet Kengashi qaroriga muvofiq O‘tkir Rahmatga "Faxriy professor" ilmiy unvoni topshirildi. Universitet rektori, professor Sherzod Mustafakulov hamda akademik Baxriddin Zaripov adibni samimiy qutlab, uning milliy jurnalistika, adabiyot va ma’naviyat rivojiga qo‘shgan beqiyos hissasini yuksak baholadilar.

Marosim so‘ngida qadrli mehmon universitetning "Dil izhori" kitobiga ezgu tilaklarini bitib qoldirdi.

Maqolada Prezidentimiz tomonidan ilgari surilgan 30-iyun — Yoshlar kuni munosabati bilan belgilangan ustuvor vazifalar mohiyati ilmiy-tahliliy nuqtai nazardan yoritilgan. Unda bugungi globallashuv, raqamli transformatsiya va sun'iy intellekt sharoitida yoshlarning oldida turgan eng muhim masalalar tahlil qilingan.

Shuningdek, maqolada sun'iy intellekt, robototexnika, biotexnologiya, raqamli iqtisodiyot, yangi kasblar ekotizimi, uzluksiz ta'lim, hayot davomida o‘qish (lifelong learning) kabi bugunning eng dolzarb yo‘nalishlari tahlil qilinib, kelajak mehnat bozori qanday mutaxassislarni talab qilishi haqida xulosalar ilgari surilgan.

"Kelajak kasblari ekotizimi" kabi o‘nlab dolzarb tashabbuslarning mazmun-mohiyatiga eʼtibor qaratilib, ushbu loyihalarning yoshlarni mehnat bozorining yangi talablariga tayyorlash, kasbiy yo‘nalish berish va zamonaviy kompetensiyalarni shakllantirishdagi ahamiyati ochib berilgan.

Maqola nafaqat yoshlar, balki ota-onalar, pedagoglar, oliy ta'lim muassasalari rahbarlari hamda ta'lim tizimi mutaxassislari uchun ham manba bo‘lib xizmat qiladi.

"Xalq so‘zi" gazetasining 4-iyul kungi bugungi sonida ushbu maqola bilan albatta batafsil tanishing.

Mazkur tashabbus O‘zbekiston va Finlandiya o‘rtasida 30 yildan ortiq vaqt davomida rivojlanib kelayotgan diplomatik aloqalarning mantiqiy davomi bo‘lib, xalq diplomatiyasini yangi bosqichga olib chiqishga xizmat qiladi.

Jamiyatning asosiy maqsadi ikki mamlakat xalqlari o‘rtasidagi do‘stlik va o‘zaro ishonchni mustahkamlash, ta’lim, ilm-fan, innovatsiyalar, madaniyat hamda jamoatchilik diplomatiyasi yo‘nalishlarida hamkorlikni kengaytirishdan iborat. Shu bilan birga, yoshlar, olimlar, tadqiqotchilar va ijodkorlar o‘rtasidagi aloqalarni rivojlantirish, qo‘shma loyihalar, konferensiyalar, ko‘rgazmalar va madaniy tadbirlarni amalga oshirish orqali yangi imkoniyatlar yaratish ko‘zda tutilgan.

Jamiyatning birinchi taʼsis yig‘ilishi Xalqaro Nordik universitetida Millatlararo munosabatlar va xorijdagi vatandoshlar masalalari bo‘yicha qo‘mitasi bo‘lim boshlig‘i Abdumalikxon Uroqov moderatorligida o‘tkazildi.

Unda universitet rektori, "O‘zbekiston–Finlandiya" do‘stlik jamiyati nazorat-taftish komissiyasi a’zosi, professor Sherzod Mustafakulov so‘zga chiqib, ikki davlat o‘rtasidagi hamkorlikning bugungi holati va istiqbollari, ta’lim hamda ilm-fan sohalarida erishilgan natijalar haqida atroflicha fikr bildirdi. U xalq diplomatiyasi davlatlar o‘rtasidagi ishonchni mustahkamlovchi va yangi hamkorlik yo‘nalishlarini ochuvchi muhim omil ekanini alohida ta’kidladi.

O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi raisi o‘rinbosari G‘anisher Irmatov Finlandiya Respublikasi 1991-yil 30-dekabrda O‘zbekiston mustaqilligini tan olgani, 1992-yilda esa ikki davlat o‘rtasida diplomatik munosabatlar o‘rnatilganini taʼkidladi.

Shuningdek, u mazkur hamkorlik bugungi kunda ta’lim, iqtisodiyot, madaniyat va boshqa qator yo‘nalishlarda izchil rivojlanayotganini eʼtirof etdi. Do‘stlik jamiyatlarining so‘nggi yillardagi amaliy natijalarini sanab o‘tdi.

Yig‘ilishda, O‘zbekiston — Finlandiya hamkorligi samarasida Xalqaro Nordik universiteti ilg‘or rivojlanish yo‘lidan borayotgani ham tilga olindi.

Majlisda ta’kidlanganidek, O‘zbekiston Respublikasi Prezidentining 2026-yil 16-fevraldagi PF–21-son Farmoni bilan xorijdagi vatandoshlarning farzandlariga o‘zbek tilini o‘rgatuvchi markazlar sonini 62 taga, aynan xorijiy davlatlar bilan do‘stlik jamiyatlari sonini esa joriy yilda 50 taga yetkazish vazifasi belgilangan. Ushbu maqsadlar ijrosida O‘zbekiston–Finlandiya do‘stlik jamiyati ham muhim o‘rin egallashi aytib o‘tildi.

Majlis davomida Xalqaro Nordik universiteti Boshqaruv kengashi raisi, Finlandiyaning O‘zbekistondagi Faxriy konsuli Alisher Rahmatullayevich Jo‘rayev "O‘zbekiston–Finlandiya" do‘stlik jamiyati Boshqaruv kengashi raisi, universitet prorektori Odil Qo‘ysinov esa rais o‘rinbosari etib tasdiqlandi.

Shuningdek, jamiyat boshqaruv kengashi hamda nazorat-taftish komissiyasi a’zolari tanishtirildi va ularning fikrlari tinglandi.

Yig‘ilish yakunida ishtirokchilar jamiyatning istiqboldagi faoliyat yo‘nalishlari yuzasidan fikr almashib, mazkur tuzilma O‘zbekiston va Finlandiya o‘rtasidagi iqtisodiy, ilmiy, ta’limiy va madaniy aloqalarni yangi bosqichga olib chiqishi, o‘zaro ishonchni mustahkamlashi hamda istiqbolli qo‘shma loyihalar uchun samarali platformaga aylanishiga ishonch bildirdilar.

O‘zbekiston–Finlandiya do‘stlik jamiyati — bu ikki davlatni nafaqat diplomatik aloqalar, balki ilm, tafakkur, madaniyat va insoniy qadriyatlar orqali yanada yaqinlashtiradigan yangi muloqot maydonidir.

Yig‘ilishda dastlab universitetni kompleks davlat akkreditatsiyasidan muvaffaqiyatli o‘tkazishga tayyorgarlik masalasiga eʼtibor qaratildi.

Mazkur yo‘nalishda amalga oshirilgan ishlar tahliliy ruhda ko‘rib chiqilib, taʼlim sifati, ichki nazorat tizimi, hujjatlar yuritilishi hamda xalqaro talablar asosida faoliyatni yanada takomillashtirish bo‘yicha vazifalar belgilandi.

Kengash davomida 2026/2027-o‘quv yili uchun bakalavriatning kunduzgi taʼlim shakliga ajratiladigan grantlar taqsimoti va reglamenti muhokama qilinib, shaffoflik, adolat va iqtidorli yoshlarni qo‘llab-quvvatlash tamoyillariga asoslangan tartib tasdiqlandi.

Shuningdek, universitet laboratoriyalarining bugungi holati, ularning ilmiy va amaliy salohiyati, talabalar qiziqishini oshirish hamda zamonaviy texnologiyalar bilan jihozlash masalalari yuzasidan hisobotlar tinglandi. Laboratoriyalar faoliyatini ishlab chiqarish, innovatsiya va ilmiy tadqiqotlar bilan yanada integratsiya qilish bo‘yicha ustuvor vazifalar belgilab olindi.

Yig‘ilishda O‘zbekiston Respublikasi Prezidentining 2025-yil 20-oktabrdagi PQ-308-son qarorida belgilangan vazifalar ijrosini taʼminlash maqsadida "E Voh" olimpiadasini samarali tashkil etish masalasi ham ko‘rildi.

Kengashda "Bitiruvchi – 2026" tadbirlarini namunali darajada tashkil etish, bitiruv hujjatlarini sifatli rasmiylashtirish, diplomlarni tantanali topshirish marosimini mazmunan boy va yuksak saviyada o‘tkazish yuzasidan ham tegishli topshiriqlar berildi.

Kun tartibidagi masalalar doirasida universitet ilmiy faoliyatining olti oylik natijalari tahlil qilinib, ilmiy maqolalar sifati, xalqaro nashrlardagi faollik, innovatsion loyihalar, grantlar hamda ilmiy hamkorlikni kengaytirish bo‘yicha istiqboldagi vazifalar muhokama etildi. Shuningdek, doktorantlar, tayanch doktorantlar va mustaqil izlanuvchilar faoliyati monitoringi natijalari ko‘rib chiqilib, ilmiy salohiyatni yanada mustahkamlashga qaratilgan tavsiyalar ilgari surildi.

Turli masalalar doirasida professor-o‘qituvchilarning malaka oshirish natijalari, o‘quv-uslubiy va ilmiy adabiyotlarni nashrga tavsiya etish, dotsent ilmiy unvoniga oid hujjatlarni rasmiylashtirish hamda yangi mustaqil izlanuvchilarning ilmiy faoliyatini tashkil qilish bilan bog‘liq masalalar ham atroflicha ko‘rib chiqildi.

Yig‘ilish yakunida barcha masalalar yuzasidan tegishli qarorlar qabul qilindi.