Kumush fasl tarovatidan bahra olindi

“TasIMO–2026” finalida O‘zbekistonning intellektual salohiyati namoyon bo‘ldi!

Loyiha Xalqaro Nordik universiteti va IDC ta’lim markazi tashabbusi bilan O‘zbekiston Respublikasi Oliy ta’lim, fan va innovatsiyalar vazirligi, Maktabgacha va maktab ta’limi vazirligi, UNICEF, AQSHning Rowan University hamda Finlyandiyaning Karelia University kabi xalqaro tashkilot va oliy ta’lim muassasalari hamkorligida amalga oshirildi.

Mazkur nufuzli loyiha nafaqat iqtidorli o‘quvchilar o‘rtasidagi bilimlar bellashuvi, balki O‘zbekistonning xalqaro ta’lim makonidagi ochiqlik siyosati, akademik integratsiyasi va intellektual diplomatiyasining amaliy ifodasi sifatida ham muhim ahamiyat kasb etdi.

Final bosqichida O‘zbekistonning barcha hududlaridan saralab olingan 150 nafar iqtidorli yosh matematik hamda AQSH, Germaniya, Buyuk Britaniya, Rossiya, Qozog‘iston, Pokiston, Bolgariya kabi o‘nlab davlatlardan tashrif buyurgan 200 nafardan ziyod ishtirokchi qatnashdi.

Olimpiada turli mamlakat yoshlari o‘rtasida ilmiy-intellektual hamkorlik muhiti shakllanishiga xizmat qiluvchi xalqaro platformaga aylandi.

Bosh homiy — ATB “Asia Alliance Bank”. Axborot hamkorlari esa UzReport TV, “Xalq so‘zi” va “Народное слово” gazetalari.

Olimpiada dasturi uch kunlik keng qamrovli intellektual festival shaklida tashkil etildi. Unda yoshlarni xalqaro olimpiadalarga tayyorlash, iqtidorlarni aniqlash va qo‘llab-quvvatlash, ularda mantiqiy fikrlash, strategik qaror qabul qilish hamda tezkor mushohada yuritish ko‘nikmalarini shakllantirishga alohida e’tibor qaratildi.

19-may kuni final bosqichga start berildi va ishtirokchilar sinflar kesimida auditoriyalarga joylashtirilib, olimpiada jarayonlari boshlandi. 3–9-sinf o‘quvchilari uchun 90 daqiqalik, 10–11-sinflar uchun esa 4,5 soatlik murakkab matematik bellashuvlar tashkil etildi. Masalalar ishtirokchilarning mantiqiy fikrlashi, algoritmik yondashuvi va tahliliy salohiyatini sinovdan o‘tkazishga qaratildi.

Olimpiada jarayonlarida adolat, ochiqlik va shaffoflik asosiy mezon sifatida belgilandi. “TasIMO–2026” olimpiadasining yuksak saviyada o‘tishiga 25 nafardan ortiq nufuzli hakamlar hay’ati a’zolari munosib hissa qo‘shdilar.

Xususan, xalqaro hakamlar – Alexander Antropov, Patrik Bak, Ivan Chan, David Hruška, Vlad Matei, Marek Murin hamda boshqa fidoyi ekspertlar yuksak professional mahoratlari, baholash va apellyasiya jarayonlarida tunu-kun xolis mehnatlari bilan ishtirok etdilar.

Apellyatsiya komissiyasi kechki soatlarga qadar faoliyat yuritdi. Bu esa ishtirokchilar, ustozlar va ota-onalar orasida ishonch muhitini yanada mustahkamladi.

–Olimpiada jarayonlari yoshlar uchun haqiqiy bilim maydoni, kuchli raqobat va irodani sinovdan o'tkazuvchi muhim bosqich hisoblanadi. Har doimgidek bu galgi olimpiadada ham shaffoflik va xalqaro standartlarga alohida e'tibor qaratildi, - deydi 8-sinflar kesimida oltin medalga sazovor bo'lgan Sirojiddin Ne'matovning ustozi Akbarjon Muhammadjonov.

“TasIMO–2026”ning muhim jihatlaridan biri shundaki, unda ishtirokchilar uchun nafaqat akademik bellashuv, balki ijtimoiy va shaxsiy rivojlanish muhiti ham yaratildi. Olimpiada doirasida misollar tahlili, intellektual muloqotlar va interaktiv mashg‘ulotlar tashkil etilib, yoshlarning mustaqil fikrlashi, xulosa chiqarishi va o‘z ustida ishlash ko‘nikmalarini rivojlantirishga xizmat qildi.

Shuningdek, sport musobaqalari, “Zakovat” intellektual o‘yinlari, konsert va shou dasturlari, varrak uchirish, arqon tortish, jamoaviy bellashuvlar, tabiat qo‘ynidagi sayrlar, “Pizza Party” hamda “Kalmar o‘yinlari” formatidagi interaktiv tadbirlar, kino kechasi ishtirokchilarda liderlik, jamoada ishlash va kommunikatsiya kompetensiyalarini rivojlantirish hamda madaniy hordiq chiqarishlariga xizmat qildi.

Bugungi zamonaviy ta’lim tizimida yuqori akademik natija bilan bir qatorda emotsional intellekt, ijtimoiy moslashuvchanlik va global fikrlash ham muhim mezon sifatida qaralmoqda. “TasIMO” esa aynan shu yondashuvni amalda namoyon etayotgan ilg‘or xalqaro ta’lim loyihalaridan biri sifatida alohida e’tiborga loyiqdir.

Final bosqichida 12 ta oltin medaldan 9 ta, 15 ta kumush medaldan 10 ta va 18 ta bronza medaldan 12 ta va 75 ta "Honourable Mention" Sertifikatidan 24 tasini O‘zbekiston yosh matematik bilimdonlar qo‘lga kiritdilar. Bu ko‘rsatkichlar esa yurtimiz yoshlarining intellektual salohiyatidan darak berib turibdi.

TasIMO-2026: “Zakovat va tafakkur maydonidagi sog‘lom raqobat"

Sahifada olimpiada final bosqichi jarayonlari, xalqaro miqyosdagi nufuzi hamda yosh matematiklarning muvaffaqiyat yo‘llari yoritildi.

Shuningdek, xalqaro olimpiadaning maqsadi va ahamiyati, O‘zbekistonning ta’limdagi yangi natijalari, xorijlik va mahalliy g‘oliblarning taassurotlari, yosh iste’dodlarning orzu va intilishlari, matematika orqali shakllanayotgan global tafakkur muhiti haqida maqola va axborotlar jamlangan.

Ushbu sahifada “TasIMO”ning xalqaro intellektual platformaga aylanib borayotgani namoyon etilgan. Ayniqsa, maqolalarda O‘zbekistonning ochiq ta’lim siyosati, yoshlar uchun yaratilayotgan imkoniyatlar hamda xalqaro akademik hamkorlik masalalariga alohida urg‘u berilgan.

“TasIMO–2026” finalida O‘zbekistonning barcha hududlari bilan bir qatorda AQSH, Germaniya, Buyuk Britaniya, Rossiya, Qozog‘iston, Pokiston, Bolgariya kabi o'nlab davlatlardan kelgan iqtidorli yoshlar ishtirok etgani musobaqaning xalqaro nufuzini yanada oshirdi.

Taʼkidlash joizki, TasIMO olimpiadasi jarayonlari keng jamoatchilik, jumladan yurtimizning xalqaro muvaffaqiyatlarga erishayotgan yosh yetakchilari tomonidan ham katta qiziqish bilan kuzatib borildi.

Gazetada ana shunday yoshlarimizdan biri — O‘zbekistonda xizmat ko‘rsatgan sportchi, "O‘zbekiston iftixori" medali va "Mehnat shuhrati" ordeni sohibi, xalqaro usta, 2026-yil shahmatchisi Javohir Sindarovning finalchilarga tilaklari va o‘z muvaffaqiyatli yo‘li misolidagi foydali tavsiyalari ham yoritildi.

Batafsil maʼlumotlar bilan “Xalq so‘zi”ning bugun — 22-may kungi sonida tanishishingiz mumkin.

Helsinki tajribasi: Toshkent va Nordik uchun yanada rivojlanish yo‘llari

Bugungi ta’lim siyosatida inson kapitalini rivojlantirish, maktabgacha ta’lim sifati, pedagoglar malakasi va sun’iy intellekt asosidagi boshqaruv tizimlari masalalariga ustuvor yo‘nalishlar sifatida qaralmoqda.

Shu nuqtai nazardan safar davomida delegatsiya aʼzolari Helsinki shahri hokimining taʼlim masalalari bo‘yicha o‘rinbosari Shawn Huff hamrohligida Helsinkidagi “Meri” bolalar bog‘chasi hamda Vattuniemi boshlang‘ich maktabi faoliyati bilan yaqindan tanishdilar. Finlandiyaning bolalarga yo‘naltirilgan ta’lim modeli, kreativ muhit va individual yondashuv tajribasini keng o‘rgandilar.

Muhokamalarda ushbu ilg‘or tajribalarni Toshkent ta’lim tizimiga moslashtirish bo‘yicha kelishuvlarga erishildi.

Helsinki shahar hokimligidagi uchrashuvlarda esa shahar strategiyasi, ta’limni boshqarish va xalqaro hamkorlikning zamonaviy mexanizmlari xususida so‘z bordi.

Finlandiya tajribasi asosida Toshkentda ham strategik boshqaruvning innovatsion modelini joriy etish masalalari ko‘rib chiqildi.

“Edulyzer” taʼlim tashkilotida bo‘lib o‘tgan uchrashuvlarda sun’iy intellekt orqali o‘quvchilarning intizomi, psixologik holati va o‘quv natijalarini monitoring qiluvchi platforma taqdim etildi. Mazkur tizim ta’limda xavfsiz va sog‘lom muhit yaratish, bolalardagi stress va ijtimoiy muammolarni erta aniqlash imkoniyati bilan ahamiyat kasb etadi. Platformani Toshkent ta’lim muassasalarida joriy etish bo‘yicha dastlabki kelishuvlarga erishildi.

Shuningdek, Helsinki universiteti hamda uning “HY+ Ltd” uzluksiz ta’lim markazi rahbariyati bilan o‘tkazilgan uchrashuvlar Xalqaro Nordik universiteti uchun yangi xalqaro bosqichni boshlab berdi.

Nordikning Ilmiy ishlar va innovatsiyalar bo‘yicha prorektori Odil Qo‘ysinov tomonidan universitetning hamkorlik aloqalari, tarixi va istiqboli haqida taqdimot o‘tkazildi. Tomonlar ilmiy hamkorlik, talabalar almashinuvi va pedagoglar malakasini oshirish yo‘nalishlarida qator muhim kelishuvlarni amalga oshirdilar va bu jihatlar memorandum imzolash orqali mustahkamlandi.

Ushbu safar Nordik universitetining xalqaro akademik integratsiyasini kuchaytirish, Finlandiyaning ilg‘or ta’lim tajribalarini O‘zbekistonga olib kirish va zamonaviy pedagogik ekotizim yaratish yo‘lida muhim poydevor bo‘ldi.

Helsinki safari ta’limni innovatsion boshqarish, sun’iy intellekt texnologiyalarini joriy etish va xalqaro akademik hamkorlikni kengaytirish borasida Toshkent hamda Xalqaro Nordik universiteti uchun istiqbolli amaliy natijalar bilan yakunlandi.

Turizmni ilmiy asosda rivojlantirish — taraqqiyotning muhim omili

Unda O‘zbekiston Respublikasi Turizm qo‘mitasi raisi Abdulaziz Aqqulov, soha mutaxassislari hamda yetakchi professor-olimlar ishtirok etdilar.

“Turizm sohasida davlat, ilm-fan va amaliyot uyg‘unligi: soha taraqqiyoti va iqtisodiy o‘sish garovi” mavzusidagi uchrashuvda 2026–2030-yillarga mo‘ljallangan Turizmni rivojlantirish strategiyasi, mamlakat turizmining uzoq muddatli modeli hamda zamonaviy turizm industriyasining global tendensiyalari muhokama qilindi.

Ta’kidlanganidek, bugungi turizm sohasi sun’iy intellekt, raqamli platformalar, ekologik yondashuvlar, “taassurot iqtisodiyoti” va individual sayohat konsepsiyalari asosida yangi bosqichga o‘tmoqda. Endilikda davlatlar o‘rtasidagi raqobat nafaqat tarixiy meros, balki innovatsion fikrlash, servis sifati va intellektual mahsulotlar bilan ham belgilanmoqda.

Uchrashuvda Xalqaro Nordik universiteti professor-olimlari ham faol ishtirok etdilar. Universitet prorektori Muhammadsiddiq Amonboyev tomonidan turizmni ilmiy asosda rivojlantirishga qaratilgan qator dolzarb tashabbuslar ilgari surildi.

Xususan:

➖ turizm sohasidagi amaliy muammolarni ilmiy tadqiqotlar asosida hal etish uchun Turizm qo‘mitasi tomonidan ilmiy loyihalar tanlovini yo‘lga qo‘yish;

➖ OTM talabalari uchun Turizm qo‘mitasi tomonidan moliyalashtiriladigan Toshkent xalqaro olimpiadasini tashkil etish hamda uni har yili xalqaro miqyosda o‘tkazish, ushbu loyiha orqali dunyo mamlakatlaridan jamoalarni jalb qilish, O‘zbekistonning turizm salohiyatini keng targ‘ib etish, MICE turizmini rivojlantirish va innovatsion yechimlarni shakllantirish taklif qilindi.

Shuningdek, turizm yo‘nalishlariga kirish imtihonlarida tarix fani o‘rniga matematika fanini asosiy fan sifatida joriy etish taklifi ilgari surildi. Tizimdagi qator muammolar sanalib, mazkur tashabbus turizm iqtisodiyoti, menejment va analitik yo‘nalishlarda kuchli bilim bazasiga ega kadrlarni tayyorlashga xizmat qilishi taʼkidlab o‘tildi.

Xalqaro Nordik universitetining ushbu tashabbuslari turizm sohasida ilm-fan, innovatsiya va xalqaro hamkorlikni yangi bosqichga olib chiqishga xizmat qilishi bilan ahamiyatlidir.